Aqtaýda jalǵan júktilik anyqtamasyn usynǵan áıel 15 táýlikke qamaldy
ASTANA. KAZINFORM - Aqtaýda kólik quralyn alkogoldik masań kúıde basqarǵan áıelge jalǵan júktilik anyqtamasyn usynǵany anyqtalyp, oǵan 15 táýlikke ákimshilik qamaqqa alý jazasy taǵaıyndaldy.
Mańǵystaý oblystyq prokýratýrasynyń habarlaýynsha, polıtsııa qyzmetkerleri áıelge qatysty ákimshilik quqyq buzýshylyq týraly hattama toltyrǵan.
Atalǵan quqyq buzýshylyq úshin Ákimshilik quqyq buzýshylyq týraly kodekste 15 táýlikke ákimshilik qamaqqa alý jáne 7 jyl merzimge kólik quralyn basqarý quqyǵynan aıyrý jazasy qarastyrylǵan.
Іsti qaraý barysynda quqyq buzýshy sotqa júktilik týraly dárigerdiń anyqtamasyn usynǵan. Osyǵan baılanysty sot ony ákimshilik qamaqtan bosatyp, 7 jyl merzimge kólik quralyn basqarý quqyǵynan aıyrý túrindegi qosymsha jazany ǵana taǵaıyndaǵan.
Aqtaý qalasynyń prokýratýrasy tekserý barysynda quqyq buzýshy usynǵan júktilik týraly anyqtamanyń jalǵan ekendigin anyqtaǵan.
Prokýrordyń ótinishhaty boıynsha Mańǵystaý oblystyq soty birinshi satydaǵy sottyń qaýlysyn ózgertip, quqyq buzýshyǵa 15 táýlikke qamaqqa alý jazasyn taǵaıyndady.
Medıtsınalyq qujatty qoldan jasaý jáne ony paıdalaný faktileri boıynsha medıtsına qyzmetkeri men quqyq buzýshyǵa qatysty Qylmystyq kodekstiń 385-babymen qylmystyq is qozǵaldy.
Prokýratýra kólik quralyn masań kúıde basqarǵany úshin jaýaptylyq týraly eskertedi jáne azamattardy zań talaptaryn saqtaýǵa shaqyrady.
Osyǵan deıin BQO-da zańsyz graffıtı salǵan jigit 5 táýlikke qamaýǵa alynǵan bolatyn.
