14:44, 20 Shilde 2025 | GMT +5
Aqtaýda jalańash er adam 11 qabatty úıdiń tóbesinen sekirip ketti
ASTANA. KAZINFORM — Polıtsııa atalǵan oqıǵaǵa qatysty qylmystyq is qozǵady, dep habarlaıdy Kazinform tilshisi.
Aqtaýda 11 qabatty úıdiń tóbesinen jalańash er adamnyń sekirip ketkeni týraly vıdeo áleýmettik jelide tarap, kópshiliktiń nazaryn aýdardy.
Beınejazbada er adamnyń úıdiń shatyryna shyqqany jáne qutqarýshylardyń oǵan kómek kórsetýge tyrysqany kórinedi. Ókinishke qaraı qutqarýshy er adamǵa jaqyndaǵan kezde ol sekirip ketedi.
Mańǵystaý oblystyq polıtsııa departamentiniń málimetinshe, atalǵan fakti boıynsha qylmystyq is qozǵalyp, tergeý amaldary júrgizilip jatyr.
Budan buryn shildeniń basynda Atyraýda kámeletke tolmaǵan 2 jasóspirim sýıtsıd jasaǵany anyqtaldy.