Aqtaýda jaǵajaı voleıbolynan jarys ótip jatyr
ASTANA. QazAqparat - Aqtaýda múgedekter arasynda jaǵajaı voleıbolynan halyqaralyq týrnır bastaldy. Úsh kúnge jalǵasatyn baıraqty básekede Slovakııa, Reseı jáne Qazaqstan sportshylary baq synasady, dep habarlady 24 kz.
Jarys úshinshi jyl qatarynan uıymdastyrylyp otyr. Munda 6 komanda synǵa túsedi. Aıta keteıik, aqtaýlyq qurama halyqaralyq deńgeıde talaı jarystarda júldeli oryndardy ıelenip júr. Atalǵan top bul joly da jeńimpaz atanýǵa úmitti.
«Biz bıyl maıda Antalııada ótken jarysta 2-oryn aldyq, onda 6 komanda qatysty. Sosyn Germanııadaǵy jarysta 3-oryn ıelendik. Onda 8 top qatysty», - dedi Mańǵystaý oblystyq múgedekter sport klýbynyń dırektory Nuraly Qulyshev.
