Aqtaýda jaǵalaýdaǵy jartastyń bir sheti opyrylyp tústi
AQTAÝ. QazAqparat - Aqtaýda teńiz jaǵalaýyndaǵy jartastyń bir sheti opyrylyp qaldy. Jaýapty mamandar «bul ádeıi jasalmaǵan, jartastar tabıǵı jolmen qulaǵan» dep otyr, dep habarlaıdy QazAqparat tilshisi.
1450 metrge sozylǵan «Jartasty soqpaq» jobasy byltyr halyq ıgiligine berilip, Mańǵystaýdyń kórikti oryndarynyń birine aınalǵan edi. Kaspıı jaǵalaýy elderiniń besinshi sammıti aıasynda jaǵalýǵa tarıhtan syr shertetin balbaltastar qoıylyp, alystan kóz tartar túrli-tústi dıodty shamdarmen bezendirildi. Turǵyndar úshin jaıly oryndyqtar ornatylyp, aǵash kópir jasalǵan bolatyn. Degenmen, kóp uzamaı ásem kórinistiń sıqy ketip, soqpaq jartylaı jabylyp qaldy.
Qala ákimdigi baspasóz qyzmetiniń málimetinshe, «Jartasty soqpaq» jobasy qala ákimdiginiń balansynda emes. Sondyqtan jaǵdaıdy qurylysty júrgizgen «Nursat» JShS bas ınjeneri Sábıt Begıev túsindirip berdi. Onyń aıtýynsha, joba áli aıaqtalmaǵan. Qurylys jumystary áli de jalǵasyp jatyr.
«Zardap shekkender joq. Qazirgi ýaqytta qulaǵan jartastyń orny tazalandy. Sonymen qatar, qaýipti aımaq retinde sol ýchaskeni lentamen qorshap qoıdyq. Jartastyń qulaýy - tabıǵı jaǵdaı. Oǵan qurylys jumystarynyń qatysy joq. Ol jerde jumystar tamyzda aıaqtalǵan bolatyn. Joba tolyǵymen osy jyldyń birinshi jartyjyldyǵynda aıaqtalady. Bári bitkende arnaıy qurylǵylarmen tekseremiz. Bul jerde merdiger mekeme ókilderi qatelik jasamady»,-deıdi ol.
