Aqtaýda zańsyz salynǵan 20 turǵyn úıdiń qurylysy toqtap tur
AQTAÝ. QazAqparat - Aqtaýda salynyp jatqan 69 úıdiń 20-nyń qurylysy zańsyz bastalǵan. Sondyqtan jumysy turalap tur, dep habarlaıdy QazAqparat tilshisi.
Jalpy, byltyr óńirde 1 mln 200 myń sharshy metr turǵyn úı, ıaǵnı 10 myńǵa jýyq páter paıdalanýǵa berilgen.
Qurylysshylarmen kezdesken oblys ákimi Serikbaı Trumov jaýaptylarǵa osy máseleni sheshýdi tapsyrdy. Mundaı olqylyq jasaǵandar zań aldynda jaýap berýi múmkin. Sondaı-aq, jańadan salynatyn turǵyn úılerdiń sapasy men syrtqy kórinisi talapqa saı bolýy shart.
«Qoqysty da kez kelgen jerge tastamaý kerek. Áli irgetasy quıylmaǵan turǵyn úı úshin turǵyndardan aqsha alý da óreskel qate»-, dedi óńir basshysy.
Serikbaı Trumov qurylysta eńbek etip júrgen kásipkerlerge rahmetin aıtyp, aldaǵy ýaqytta salynatyn úılerdiń sapasyna qatty mán berýdi tapsyrdy.
«Kelesi salynatyn úılerdiń barlyǵy zań talaptaryna saı bolý kerek. Saraptamadan ótken, barlyq jergilikti atqarýshy organmen kelisilgen jobalarǵa ǵana ruqsat beriledi»,-dedi Serikbaı Trumov.
