Aqtaýda zańsyz jer basyp alý faktileri baqylaýǵa alyndy
ASTANA. KAZINFORM — Aqtaý qalalyq jer qatynastary bólimi júrgizgen vızýaldy monıtorıng barysynda 16-shaǵyn aýdanda memlekettik jerdi óz betinshe ıelený deregi anyqtaldy.
Aqtaý qalasy ákimdiginiń baspasóz qyzmetiniń málimetinshe, atalǵan derek boıynsha Qazaqstan Respýblıkasynyń qoldanystaǵy zańnamasyna sáıkes akt jasaqtalyp, materıaldar tıisti shara qabyldaý úshin Mańǵystaý oblysynyń jer resýrstaryn basqarý departamentine joldandy.
— Vızýaldy monıtorıng kezinde 16-shaǵyn aýdanda ornalasqan «Aıtan» kafesiniń mańynda jer ýchaskesiniń menshik ıesi memlekettik jerdi óz betimen basyp alǵany anyqtaldy. Bul derek boıynsha akt toltyrylyp, tekseris júrgizý úshin materıaldar oblystyq jer resýrstaryn basqarý departamentine joldandy, — dedi Aqtaý qalalyq jer qatynastary bóliminiń mamany Aıbek Baımahanbetov.
Aldaǵy ýaqytta jer zańnamasynyń saqtalýyn qamtamasyz etý, jerdi maqsatsyz paıdalaný men óz betinshe basyp alý jaǵdaılarynyń aldyn alý maqsatynda turaqty túrde monıtorıng jumystary júrgiziletin bolady.
Budan buryn Aqtaý qalasynda 1300-den asa páterge jylý berý shektelgenin jazǵanbyz.