Aqtaýda zańsyz salynyp jatqan qonaqúı buzyldy
Aqtaýda № 9 óndiristik aımaqtaǵy № 39/7 ýchaskesinde ornalasqan zańsyz salynyp jatqan qonaqúı buzyldy. Nysan qurylystyń negizgi talaptaryn saqtamaı jáne jobalaý-smetalyq qujattamasynsyz salynǵan, dep habarlaıdy Kazinform.
Nysannyń zańsyz salynyp jatqany Mańǵystaý oblysynyń memlekettik sáýlet-qurylys baqylaý basqarmasynyń jospardan tys tekserý barysynda anyqtalǵan. Qurylys salýshyǵa Qazaqstan Respýblıkasy Ákimshilik quqyq buzýshylyq týraly kodeksiniń 316-babynyń 1-bóligine, 321-babynyń 1-bóligine jáne 463-babynyń 1-bóligine sáıkes ákimshilik hattama toltyrylǵan. Sonymen qatar oǵan qurylys-montaj jumystaryn toqtatý týraly nusqama berilgen.
Alaıda kásipker bul eskertýlerdi elemegen. Sondyqtan Mańǵystaý oblysynyń memlekettik sáýlet-qurylys baqylaý basqarmasy QR Azamattyq kodeksiniń 244-babyna sáıkes óz betinshe salynǵan zańsyz qurylys obektisin májbúrlep buzý týraly talap-aryz berip, ol sot sheshimimen qanaǵattandyrylǵan.
- Zańsyz qurylystarǵa qarsy kúres maqsatynda sot isteri júrgizilip jatyr. Sonyń nátıjesinde Aqtaýda 29 qurylys zańsyz dep tanylyp, sot onyń 28-in buzý týraly sheshim shyǵardy. Alǵashqysy 30 qazanda buzyldy. Al bul qonaqúı qurylysy bekitilgen jumys jobasy joq, saraptamanyń oń qorytyndysy alynbaı turǵyzylǵan. Sonymen qatar, tehnıkalyq qadaǵalaý jáne avtorlyq qadaǵalaý júrgizilmegen, - dedi Aqtaý qalasy qurylysyn baqylaý bóliminiń basshysy Nurbol Jolanbekov.
