Zańsyz lotereıa oınatty degen kúdikpen ánshi Abaı Begeıdiń qyzy ustaldy
AQTAÝ. KAZINFORM — Aqtaý qalasynda erli-zaıyptylar Instagram, TikTok jáne Telegram jelilerinde 850 myńnan astam oqyrmandarynyń arasynda aýqymdy onlaın-lotereıalar uıymdastyrǵan. Bul týraly Qarjylyq monıtorıng agenttigi málim etti.
— Lotereıa operatory retinde tirkelmegenine qaramastan, olar avtokólik, páter jáne basqa da baǵaly júldeler oınatqan. Qatysýshylar quny 500-den 50 000 teńgeni quraıtyn bılet (tsıfrlyq nómir) satyp alyp otyrǵan, — delingen habarlamada.
Tergeý málimetterine sáıkes, bul lotereıalarǵa 1 800-den astam azamat qatysqan. Zańsyz qyzmet nátıjesinde qylmystyq tabys somasy 162 mln teńgeden asqany anyqtaldy. Qazirgi ýaqytta kúdiktilerdiń múlki men bank shottaryna tyıym salyndy.
Sotqa deıingi tergeý jalǵasýda. QR Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Buǵan deıin habarlanǵandaı, Qarjylyq monıtorıng agenttigi jyl basynan beri 36 qarjy pıramıdasynyń qyzmetin toqtatty.