Aqtaýda zaǵıp balalarǵa arnalǵan ertegiler braıl júıesinde jasaldy

AQTAÝ.QazAqparat - Aqtaýda Q.Sydıyqov atyndaǵy oblystyq ámbebap kitaphanasyndaǵy arnaýly bólimniń áleýmettik qyzmetkeri Saıda Qusaıynova balalarǵa arnalǵan kitapshalar men ertegilerdi braıl júıesinde daıyndap shyqty, dep habarlaıdy QazAqparat tilshisi.

«Balalar jańa jylǵa syılyqtar kútedi. Kóńilderin kóterý úshin men de tyrysqym keldi. Balalarǵa arnalǵan bul kitapshalar qol motorıkasyn damytyp, olardyń oqýǵa qyzyǵýshylyǵyn arttyrady dep senemin» - dedi Saıda Qusaıynova.

Aıta keteıik, Saıda Qusaıynova barlyǵy 8 kitapsha daıyndap shyqqan. Onyń beseýi – ertegi, ekeýi balalardyń qyzyǵýshylyǵyna qaraı jasalǵan Túrik qaǵanaty men Motsarttyń ómirbaıany kitapshasy jáne bireýi – kórneki qural.

Saıda Qusaıynova - 30 jasta. 2019 jyldan beri kitaphananyń arnaýly bóliminde áleýmettik qyzmetker retinde braıldan balalarǵa qosymsha sabaq júrgizedi. Ol - Oral qalasyndaǵy zaǵıp jáne nashar kóretin balalarǵa arnalǵan mekteptiń túlegi.