Aqtaýda WorldSkills Kazakhstan chempıonaty bastaldy

AQTAÝ. QazAqparat - Aqtaýda jumysshy mamandar arasyndaǵy «Worldskills Kazakhstan 2022» VII Respýblıkalyq kásibı sheberlik chempıonatynyń aımaqtyq kezeńiniń ashylý saltanaty ótti, dep habarlaıdy QazAqparat tilshisi.

Worldskills-jas mamandardyń kásibı biliktiligin arttyrýǵa negizdelgen halyqaralyq joba. Ol 1946 jyldan bastap álemniń 83 elinde ótkiziledi.

Uıymdastyrýshylardyń aıtýynsha, qoǵamǵa qajetti mamandardyń biliktiligin arttyrý osy joba aıasynda júzege asyrylady.

Úsh kúnge sozylatyn aımaqtyq chempıonatqa 22 kolledjden 388 stýdent jáne 50 mektep oqýshysy, 12 balabaqsha tárbıelenýshileri qatysýda. Olar 77 mamandyq boıynsha jarysady. Qatysýshylardyń jumysyn shamamen 420 sarapshy baqylaıdy.

WorldSkills jobasy aıasynda Mańǵystaý oblysynda balabaqsha tárbıelenýshilerin eńbekke baýlý maqsatynda ótken jyldan bastap «BabySkills Aktau» chempıonaty ótkizilip jatyr. Al bıylǵy chempıonattyń ereksheligi - óńirde alǵash ret óskeleń urpaqty qazaq halqynyń ulttyq mádenıetine, salt-dástúrine, rýhanı jáne adamgershilik-etıkalyq qundylyqtaryna tárbıeleý maqsatynda Dalaskills baıqaýy ótkiziledi. Onda balalar mataǵa sýret salý, Ulttyq quraq óneri, kıiz óneri, ulttyq taǵamdar jasaýdan jarysady.

I oryn alǵan óńirlik kezeńniń jeńimpazdary «WorldSkills Kazakhstan» respýblıkalyq kásibı sheberlik chempıonatyna joldama alyp, Nur-Sultan qalasynda baq synaıtyn bolady.