Aqtaýda velosıpedshini qaǵyp ketken júrgizýshige qatysty qylmystyq is qozǵaldy
AQTAÝ. QazAqparat - Aqtaýda velosıped mingen adamdy qaǵyp, jazym etken júrgizýshige qatysty qylmystyq is qozǵaldy, dep habarlaıdy QazAqparat tilshisi Mańǵystaý oblystyq ІІD baspasóz qyzmetine silteme jasap.
Júrgizýshige qatysty QR Qylmystyq kodeksiniń 345-baby 3-bólimi boıynsha is qozǵalyp, sotqa deıingi tergeý bastaldy.
Aıta keteıik, oqys oqıǵa osydan 10 kún buryn «Hımık» aýylyndaǵy jolda bolǵan edi. Shacman aýyr júk kóligi jol shetinde ketip bara jatqan velosıpedshini qaǵyp ketip, ol aýyr jaraqat saldarynan sol jerde kóz jumǵan bolatyn.
