Aqtaýda vaktsına alýshylar arasynda 2 bólmeli páter utysqa tigildi
«Koronavıýrsqa qarsy vaktsınalaý jumystary jalǵasýda. Búginde birinshi komponetpen 57 800, ekinshi komponentpen 33 350 adam egildi. Onyń ishinde densaýlyq saqtaý salasy 99 paıyzǵa, quqyq qorǵaý organdarynyń qyzmetkerleri 100 paıyzǵa vaktsınalandy», - dedi Serikbaı Trumov Úkimet otyrysynda.
Ákimniń sózine qaraǵanda, vaktsınalaý jumystaryn odan ári kúsheıtý úshin arnaıy shtab qurylyp, basqa da sanattar boıynsha naqty jumystar júrgizilip jatyr.
«Júrgizilgen jumystardyń nátıjesinde osy aıdyń birinshi onkúndiginde birinshi komponentpen 3454 adam egilse, ekinshi onkúndikte 5128-ge deıin ósti. Sońǵy aptada 8 myńǵa jýyq adam ekpe aldy. Bilim berý júıesinde vaktsına alǵan qyzmetkerlerdiń úlesi 38-den 45 payzǵa deıin jetkizildi. Jańa oqý jylyna deıin salanyń barlyq qyzmetkerleri ekpe jumysyn aıaqtaıdy. Sonymen birge qurylysy kompanııalarynyń qyzmetkerlerin vaktsınalaý kestesi bekitildi. Halyqty vaktsınalaý úshin jyljymaly brıgadalardyń jumysy jáne aýyldy jerlerde úılerdi aralaý arqyly aqparattyq túsindirý jumystary kúsheıtildi», - dedi oblys basshysy.
Túsindirý jumystarynan bólek, apta saıyn túrli baǵaly zattar utysqa tigilýde. Arasynda tipti páter de bar.
«Halyqty vaktsına alýǵa yntalandyrý úshin óńirde 22 maýsymnan bastap basty júlde - Aqtaý qalasyndaǵy eki bólmeli páterge utys oıyny jarııalandy. Vaktsına alýshylar qarqynyn arttyrý úshin apta saıyn turmystyq tehnıka, smartfondar, tońazytqyshtar, teledıdar sııaqty baǵaly syılyqtar oınatylyp turady. Jeńimpazdar arnaıy qurylǵan saıt arqyly tikele efırde anyqtalady», - dedi Mańǵystaý oblysynyń ákimi.