Aqtaýda vagonda turyp kelgen kópbalaly otbasy baspanaly boldy

AQTAÝ. QazAqparat - Aqtaý qalasynda jomart jandar 6 balaly otbasyǵa jańa salynǵan úıden eki bólmeli páterdiń kiltin tabys etti, dep habarlaıdy QazAqparat tilshisi.

Kópbalaly otbasy osyǵan deıin shahar irgesindegi ıesiz jatqan óndiristik aımaqtaǵy temir vagondy panalap kelgen. Mundaı syılyqty kútpegen «Kúmis alqa» ıegeri Naǵıma Kópjasarovanyń qýanyshynda shek joq. Onyń 2 balasy men joldasy - birinshi toptaǵy múgedek.

«Endi olardyń jyly da jaıly úıde turýyna múmkindik týdy»,-deıdi kópbalaly ana Naǵıma Kópjasarova.

Qonys toıyn toılaýǵa ıgilikti iske uıytqy bolǵan jergilikti bılik pen «Aqjúnis» analar qoǵamynyń ókilderi de keldi. Aıta keteıik, 30-shaǵynaýdandaǵy páter «K7 Grour» qurylys kompanııasynyń demeýshiligimen berilgen.

«Búgin - eń qýanyshty kún. Bul otbasymyz úshin keremet jańalyq boldy. Áli de tolqyp turmyn. Qyzdarym qatty qýanyp jatyr. Mundaı páterge qol jetkizemin dep eshqashan oılaǵan emespin. Qýanyshtymyn, qoldaý kórsetken jandarǵa Alla razy bolsyn»,-deıdi qýanyshyn jasyra almaǵan Naǵıma Kópjasarova.

«Qoldan kelse, adamgershilik jasap, kómek kórsetkenge ne jetsin. Óz atymnan, «Aqjúnis» analar qoǵamynyń atynan úlken alǵysymdy aıtamyn. Naǵıma Kópjasarova osy úıde bala-shaǵasymen, otaǵasymen baqytty ómir súretinine senemiz. Otaǵasy Serik aǵamyz qoly altyn sheber eken. Aǵashtan ártúrli buıymdar jasaıdy. Biz ol kisini Aqtaý qalasy boıynsha «Bıznes 3 kúnde» jobasyna tartýdy oılap otyrmyz. Sol arqyly ol kisiniń kásibin damytýǵa qolushyn bergimiz keledi»,-deıdi «Aqjúnis» analar qoǵamynyń oblystaǵy jetekshisi Anar Shamshadınova.