Aqtaýda úıiniń kireberisin ulttyq naqyshta bezendirgen turǵyn tapsyrystyń astynda qalǵan
AQTAÝ. KAZINFORM – Aqtaýda 28-shaǵyn aýdandaǵy 16-úıdiń turǵyny Meıramgúl Tuńǵatarova kópqabatty úıdiń eki qabatynyń qabyrǵasyna kıiz úıdiń keregesin, quraq kórpeler jınalǵan sandyq pen kóne jádigerlerdi salyp, kópshilikke tanyldy. Sodan beri turǵyndardan tapsyrys kóbeıgen. Ulttyq naqyshta balabaqshalardyń qabyrǵalaryn bezendirýge de suranystar túsken.
- Turǵyn úı — bul ózimizdiń uıamyz. Ózimizdiń úıimizdiń mańy taza bolǵanyn qalaımyz. Mundaı ulttyq naqyshtaǵy beınelerdi salý úshin birinshi óz podezimizdiń turǵyndarynan ruqsat aldym. Al ıdeıa mekteptegi júzege asyratyn jobamnan týyndady. Tek mekteppen shektelmeı, ulttyq naqyshtaǵy beınelerdi ózim turyp jatqan úıdiń kireberisine de salǵym keldi. Negizgi maqsat - balalarymyzdy tazalyqqa úıretip, olardyń boıynda ulttyq qundylyqtardy qalyptastyrý, - dedi Meıramgúl Tuńǵatarova.
Meıramgúl Tuńǵatarova Aqtaý qalasyndaǵy №20 Muhtar Áýezov atyndaǵy jalpy bilim beretin mekteptiń kórkem eńbek pániniń muǵalimi. Ol mektepte óz qolymen etnoaýyl jasaǵan.
- Árıne, ulttyq qundylyqty keıingi urpaqqa nasıhattaı otyryp, óskeleń urpaǵymyzdy tárbıeleý - árbir adamnyń mindeti dep sanaımyn. Aqtaý qalasynda ádemi ulttyq naqyshtaǵy dúnıeler kóp bolǵanyn qalaımyn. Maǵan eki balabaqshadan jáne jeke adamdardan tapsyrys tústi. Biraq mekteptegi jumysym bar. Úlgermeıtin bolǵasyn, kelispedim, - deıdi sheber.
Kórshi-kólemge, barsha aqtaýlyqtarǵa úlgi bolyp, el boıynsha júrip jatqan “Taza Qazaqstan” tazalyq sharasyna atsalysqan turǵynǵa qala ákiminiń alǵysy jarııalandy.
Buǵan deıin Aqtaýda “Taza Qazaqstan” ekologııalyq aktsııasy aıasynda teńiz túbin tazartý jumystary bastalǵanyn jazǵan bolatynbyz.
