Aqtaýda ushaq bortynan shuǵyl aýrýhanaǵa jetkizilgen 6 aılyq sábı kóz jumdy

AQTAÝ. QazAqparat – 30 qarashada ushaq bortynan shuǵyl aýrýhanaǵa jetkizilgen 6 aılyq sábı kóz jumdy, dep habarlaıdy QazAqparat tilshisi Mańǵystaý oblysynyń densaýlyq saqtaý basqarmasyna silteme jasap.

«Náreste óte aýyr halde aýrýhanaǵa jetkizildi. Al, 2 jeltoqsan kúni bıologııalyq ólim tirkeldi. Dárigerler balany qutqara almady. Balanyń ata-anasy Oraldyń turǵyndary», - delingen oblystyq densaýlyq saqtaý basqarmasynyń baspasóz qyzmeti bergen aqparatta.

Aıta keteıik, 30 qarasha kúni Aqtaýdan Túrkııaǵa ushyp shyqqan ushaq áýejaıǵa qaıta oralǵanyn jazǵan bolatynbyz. «SCAT» áýekompanııasynyń qoǵammen baılanys bóliminiń basshysy Vıktorııa Starojılova habarlaǵandaı, bortta bolǵan bala ózin nashar sezingen.