Aqtaýda úleskerlerden zańsyz aqsha alǵan alaıaq kompanııalar jazalandy

AQTAÝ. QazAqparat - Aqtaýda birneshe qurylys kompanııasy jaýapqa tartyldy. Bul týraly Mańǵystaý oblysy óńirlik kommýnıkatsııalar qyzmetinde ótken brıfıngte aıtyldy, dep habarlaıdy QazAqparat.

Áleýmettik jelilerde jańadan salynyp jatqan turǵyn úıler satylymǵa shyqqany jóninde jarııalanýda. Degenmen, ol úshin úleskerler qarajaty esebinen turǵyn úı qurylysyn júzege asyrýǵa nıet bildirýshiler QR «Turǵyn úı qurylysyna úlestik qatysý týraly» zańyna sáıkes, jergilikti atqarýshy organnan beriletin ruqsat qujattaryn rásimdeýi qajet.

«Alaıda, búgingi kúni Aqtaý qalasy aýmaǵynda turǵyn úı salyp jatqandar úleskerler qarajatyn tartýǵa ruqsat surap júginbegen. ıAǵnı bir de bir tulǵada atalǵan ruqsat joq. Mańǵystaý oblystyq prokýratýrasy usynǵan derekterge súıensek, qyrkúıek aıynyń sońynda Aqtaý qalalyq sotynyń sheshimimen «NıetStroıServıs» dırektory asa aýyr sıpatta alaıaqtyq jasady dep tanylyp, 6 jylǵa bas bostandyǵynan aıryldy» delingen óńirlik kommýnıkatsııalar qyzmeti taratqan habarlamada.

Úleskerler qarajatyn zańsyz tartqany úshin birneshe qurylys kompanııasynyń ókilderi ákimshilik jaýapkershilikke tartylǵan. QR «Ákimshilik quqyq buzý kodeksiniń 320-baby boıynsha 3 qurylys kompanııasy jaýapqa tartyldy. Olar - «Kompanııa StroıAlıans», «KZ West Snab» jáne «Nıet Stroı Servıs».

Qala aýmaǵynda qurylysy júrip jatqan turǵyn úılerge qatysty qandaı da bir aqparat qajet bolsa, Aqtaý qalalyq sáýlet jáne qala qurylysy bólimine habarlasýǵa bolady.