Aqtaýda úleskerler qarjy salǵan 6 úıdiń qurylysy bitpeı tur

AQTAÝ. KAZINFORM - Memleket basshysy Qasym-Jomart Toqaev Mańǵystaý oblysynyń áleýmettik-ekonomıkalyq damýy jónindegi keńes barysynda Aqtaýdy jylýmen qamtý jáne turǵyn úılerdi jańǵyrtý máselesine nazar aýdardy.

– Qazir Aqtaýǵa jylýdy «MAEK» kompanııasy beredi. Biraq oblys ortalyǵy tez ósip jatyr. Qalany jylýmen tolyq qamtamasyz etýge kásiporynnyń qýaty jetpeıdi. Byltyr Aqtaýda uzyndyǵy 12 shaqyrym bolatyn jylý jelisi salynyp, jańǵyrtyldy. Nátıjesinde qalaǵa jylýdyń durys jetýine múmkindik týdy. Osy baǵyttaǵy jumysty jalǵastyrý kerek. Byltyr oblysta 846 myń sharshy metr turǵyn úı salyndy. Bul – jospardan 20 paıyzǵa artyq. Degenmen oblystaǵy turǵyn úı qorynyń 7 paıyzy ábden eskirgen, - dedi Prezıdent.

Memleket basshysy keltirgen derekter boıynsha, qalada kóp páterli 177 úı kúrdeli jóndeýdi qajet etedi. Sondyqtan turǵyn úılerdi jańǵyrtý máselesine aıryqsha nazar aýdarý kerek.

- Maǵan túsken aqparat boıynsha Aqtaýda úleskerler qarjy salǵan 6 úıdiń qurylysy bitpeı tur. Orynsyz, ıaǵnı beı-bereket salynǵan qurylys nysandary da bar. Bul máselelerdi sheshý úshin Úkimet ákimdikpen birge naqty sharalar qabyldaýy kerek, - dep eskertti Qasym-Jomart Toqaev.

Osyǵan deıin Toqaev týrızmniń qarqyndy damýyna jol ashatyn baǵyttardy atady.