Aqtaýda tyıym salynǵan preparat satqan dárihana anyqtaldy

AQTAÝ. QazAqparat – Aqtaýda profılaktıka sharasy kezinde tyıym salǵan preparatty retseptisiz satqan dárihanalar anyqtaldy, dep habarlaıdy QazAqparat tilshisi.

Bul týraly oblystyq polıtsııa departamenti bastyǵynyń orynbasary Altynbek Qalıev habarlady.

«Jalpy, bizde «Dopıng» profılaktıkalyq sharasy ótedi. Onda aptekalar, aýrýhanalar tekseriledi. Quramynda esirtki bar preparattar bolady, ony retseptisiz satady. Ondaı faktilerdi anyqtap, 2 dárihana ıesi jaýapqa tartyldy. Olarǵa 50 AEK, 100 AEK aıyppul salyndy», - deıdi MO Polıtsııa departamenti bastyǵynyń orynbasary Altynbek Qalıev.

Jalpy, jyl basynan beri 278 tulǵa esirtki qylmysyna qatysty jaýapkershilikke tartylsa, 394 zań buzýshylyq anyqtalǵan. Onyń ishinde esirtkini iri kólemde saqtaý faktisi — beseý, esirtki quramdas ósimdikti ósirgendigi týraly tórt derek tirkelgen. Sondaı-aq, esirtki tasymaldaýmen aınalysatyn uıymdasqan qylmystyq top quryqtaldy. 5 adamnan turatyn top osy ýaqytqa deıin iri kólemde qaýipti zattardy satyp kelgen.

«2 esirtki kontrabandasy faktisi anyqtaldy. 3 esirtki prıtondaryn uıymdastyrý jáne ustaý deregi anyqtaldy. Zańsyz aınalymnan 197 kg 865 gramm ártúrli esirtki zattar tárkilendi. Onyń ishinde 630 geroın zańsyz aınalymnan alyndy», - deıdi Altynbek Qalıev.