Aqtaýda tyıym salynǵan dinı kitaptardy saqtaǵan er adam ustaldy

ASTANA. QazAqparat - Kóliktegi ishki ister organdary ekstremıstik mazmundaǵy aqparattyq materıaldardy tasymaldaý, saqtaý jáne respýblıka aýmaǵynda taratý faktilerin anyqtaý jáne  jolyn kesý boıynsha udaıy negizde is-sharalar ótkizýde, dep habarlaıdy Kóliktegi ІІD baspasóz qyzmeti.

Atalǵan qyzmet aıasynda kólik polıtseıleri Aqtaý qalasynyń halyqaralyq áýejaıynda jedel-izdestirý is-sharalarynyń barysynda Atyraý qalasynyń 24 jastaǵy turǵynyn ustady. Tekserý barysynda odan dinı mazmundaǵy materıaldar, atap aıtqanda 15 kitap, 17 dápter, 10 broshıýra men arab tilinde jazylǵan úndeý paraqshalary  tabylyp, tárkilenip alyndy.

Júrgizilgen dintaný saraptamasynyń qorytyndysyna sáıkes, tárkilenip alynǵan materıaldardyń mazmunynda dinı alaýyzdyqty qozdyratyn belgiler barlyǵy anyqtaldy.

Ustalǵan azamat Aqtaý qalasy mamandandyrylǵan aýdanaralyq ákimshilik sotynyń qaýlysymen QR ÁQBtK 453-baby 4-bóligi boıynsha ákimshilik jaýapkershilikke tartylyp, oǵan 100 AEK túrindegi (226900 teńge) aıyppul salyndy.