Aqtaýda túrmeden qashqan 21 adamnyń 13-i áli de izdestirilýde - Bas prokýratýra
ASTANA. Maýsymnyń 24-i. QazAqparat /Aıdar Ospanálıev/ - Aqtaýdaǵy bas bostandyǵynan aıyrý ornynan qashqan 21 qylmyskerdiń is-áreketine baılanysty birneshe qylmystyq is qozǵaldy.
Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti.
Onyń sózine qaraǵanda, qylmystyq isterdiń biri qylmyskerlerdiń túrmeden qashý áreketine qatysty qozǵalsa, ekinshisi qylmystyq atqarý júıesiniń qyzmetterine qarsy oq atý faktisine baılanysty bolyp otyr. Úshinshi qylmystyq isti prokýratýra organdary qylmystyq atqarý júıesiniń qyzmetterine qatysty «qyzmet babynda salaqtyq tanytty» degen aıyppen qozǵap otyr.
«Qazirgi tańda atalmysh áreketterdiń barlyǵy tekserilý ústinde jáne olar Bas prokýrordyń nazarynda», dedi resmı ókil. Onyń aıtýynsha, osy ýaqytta oqıǵa bolǵan aımaqqa tekserý- tergeý jumystaryn júrgizý maqsatynda quzyrly organ ókilderi attandy. Túrmeden qashqan 21 adamnyń 13 -i áli de izdestirilýde, dedi N. Súıindikov.
