Aqtaýda TurkicSkills 2025 halyqaralyq kásibı sheberlik chempıonaty bastaldy

ASTANA. KAZINFORM — Jumysshy mamandyqtar jyly aıasynda búgin Aqtaý qalasynda Qazaqstannyń bastamasymen tuńǵysh TurkicSkills halyqaralyq kásibı sheberlik chempıonatynyń ashylý saltanaty ótti. Bul týraly Oqý-aǵartý mınıstrliginiń baspasóz qyzmeti habarlady.

Chempıonatqa Túrki memleketterinen kelgen tehnıkalyq jáne kásiptik uıymdarynyń stýdentteri, sarapshylar sala ókilderi qatysýda.

Іs-sharanyń basty maqsaty — tehnıkalyq jáne kásiptik bilim berý júıesinde úzdik tájirıbeni taratý, halyqaralyq yntymaqtastyqty nyǵaıtý jáne jastardyń kásibı áleýetin arttyrý.

Chempıonattyń ashylý saltanatyna Oqý-aǵartý birinshi vıtse-mınıstri Maıra Meldebekova qatysty.

— Memleket basshysy Qasym-Jomart Toqaevtyń 2025 jyldy Jumysshy mamandyqtar jyly — dep jarııalaýy — tehnıkalyq jáne kásiptik bilim berý júıesin jańǵyrtýdyń mańyzdy kezeńiniń bastalýy boldy. TurkicSkills chempıonaty — osy jyldyń basty oqıǵalarynyń biri. Bul alań jastardyń kásibı sheberligin kórsetip qana qoımaı, túrki elderi arasyndaǵy yntymaqtastyqty, tájirıbe almasýdy tereńdetedi, — dedi Oqý-aǵartý vıtse-mınıstri Maıra Meldebekova.

Chempıonatqa 70-ten astam stýdentter men jas maman jáne 90 sarapshy qatysýda. Olar ınjenerııa, aqparattyq tehnologııalar, óndiris, robototehnıka jáne qyzmet kórsetý salalary boıynsha baq synaıdy.

TurkicSkills chempıonaty 9 qazanǵa deıin jalǵasady. 

Aıta ketelik búgin elimizde dúnıedegi eń asyl, jaýapty ári mańyzdy mamandyq ókilderi – muǵalimder kúni. Bul kún elimizde biraz ýaqytqa deıin qazan aıynyń birinshi jeksenbisinde atalyp ótip keldi. Al 2023 jyly Úkimet qaýlysymen 5 qazanǵa bekitilgen edi.