Aqtaýda túrki elderiniń erekshe qajettiligi bar balalary bas qosty
AQTAÝ. KAZINFORM — Aqtaýda «Meıirimdi túrki álemi» atty erekshe qajettiligi bar balalar men jastarǵa arnalǵan shyǵarmashylyq festıvali ótti. Oǵan Ázerbaıjan, Ózbekstan, Qyrǵyzstan jáne Qazaqstannan 70-ten astam jetkinshek pen jastar qatysyp, óner kórsetti.
Shyǵarmashylyq festıval «Aqtaý — túrki áleminiń mádenı astanasy» jyly aıasynda alǵash ret uıymdastyrylǵan. Іs-sharada 5 jastan 25 jasqa deıingi balalar men jastar án aıtyp, bı bılep, óleń oqyp, túrli mýzykalyq aspaptarda oınady.
Jas ónerpazdarǵa TÚRKSOI halyqaralyq uıymynyń jáne Aqtaý qalasy ákiminiń atynan Alǵys hattar tabystalyp, syılyqtar berildi.
- «Meıirimdi túrki álemi» halyqaralyq shyǵarmashylyq festıvaline baýyrlas elder — Ázerbaıjan, Ózbekstan, Qyrǵyzstan, Túrkııa,, Túrikmenstannan jáne Qazaqstannyń ár óńirinen talantty balalar kelip otyr. Meıirimdi qoǵam qurý bastamasyna qoldaý bildirip, osy jolda elder arasyndaǵy yntymaqtastyqty nyǵaıtýǵa úles qosyp jatqan áriptesterge kóp rahmet. Oıymyz ortaq — balalardyń baqytty ómir súrýine, erekshe qajettilikterin qamtamasyz etip, qoǵamǵa beıimdelýine jaǵdaı jasaý. Búgingi festıvalde balalar ónerin kórsetip, bir-birimen tanysyp qana qoımaıdy, sonymen birge dostyqtyń, yntymaqtyń, shynaıy nıettestiktiń úlgisin pash etedi, - dedi festıvaldiń jabylý saltanatynda Aqtaý qalasy ákiminiń orynbasary Bekzat Júsip.
— Búkil qatysýshylar — erekshe qajettiligi bar jastar men balalar jáne múgedektigi bar balalar. Negizi, qoǵamda bizdiń balalarymyz múmkindigi shekteýli balalar dep atalady. Biraq men sondaı sózderge óte qarsymyn. Bizdiń balalarymyzda eshqandaı shekteý joq. Bizdiń balalardyń shyǵarmashylyǵy shekteýsiz. Olar án aıtady, bıleıdi, kórkem sóz oqıdy, — deıdi is-sharany uıymdastyrýshy Qarlyǵash Álmuhambetova.
Aıta keteıik, Aqtaý estafetany Túrikmenstannyń Anaý qalasynan qabyldaǵan bolatyn. Ashhabadta ótken TÚRKSOI Túrki mádenıeti men ónerin damytý jónindegi halyqaralyq uıymǵa múshe memleketterdiń 41-shi otyrysynda mańǵystaýlyq delegatsııa «Túrki áleminiń mádenı astanasy» mártebesin qabyldap aldy.
Buǵan deıin, TÚRKSOI uıymynyń bas hatshysy Sultan Raev Aqtaýda otyzǵa jýyq mádenı is-shara ótetinin aıtqan bolatyn.