Aqtaýda týrısterge arnap QR-kody bar tablolar ornatyldy

AQTAÝ. QazAqparat - Mańǵystaý oblysynyń ınvestıtsılar jáne týrızmdi damytý basqarmasy men oblystyq kásipkerler palatasynyń qoldaýymen Aqtaýdaǵy qoǵamdyq oryndar men áýejaıǵa «Visit Mangystau» logotıpi men týrısterge arnalǵan QR-kodtary bar arnaıy tablolar ornatyldy, dep habarlaıdy QazAqparat tilshisi.

Bastama «Visit Mangystau» jobasy aıasynda júzege asty. Bul týraly Aqtaý qalalyq kásipkerlik jáne aýyl sharýashylyǵy bóliminiń basshysy Tilegen Edigeev málim etti.

Onyń aıtýynsha, bul joba qonaqtardy aımaqpen tanystyrýǵa baǵyttalǵan. Jasalǵan jolsilteme týrısterge qala mádenıeti men tarıhyn bilýge kómektesedi.

Sondaı-aq, aıaldamalarda QR-kodtarymen qosa Mańǵystaý oblysy men Aqtaý qalasynyń eń úzdik 5 oryndary kórsetilgen sýretter ornatyldy.

Endigi kezekte qala aýmaǵyndaǵy birqatar qonaq úıde Mańǵystaýdyń kórikti jerleri týraly beınerolıkter kórsetiledi.

«Mańǵystaý oblysy boıynsha eń úzdik dep ázirge Bozjyra, Tuzbaıyr sory, Qaraqııa oıpaty, Aıraqty-Shomalaı jáne Sherqala taýy tanyldy. Al, qala boıynsha 15 shaǵynaýdan teńiz jaǵalaýy, Jartasty soqpaq pen «Akvarıýs» sý asty álemi, 1 b shaǵyn aýdanyndaǵy sýdaǵy oıyn-saýyq pen demalys orny jáne Ábish Kekilbaev atyndaǵy tarıhı-ólketaný murajaılary belgilendi», - deıdi Tilegen Edigeev.

QR-kodtaǵy jolserik arqyly ár týrıst Aqtaý qalasynyń tarıhymen tanysa otyryp, qonaq úılerge, kınoteatrlar men drama teatryna, meıramhanalar men kafelerge adaspaı barýǵa múmkindik alady.