Aqtaýda turǵynnan aqsha bopsalaǵan kúdikti ustaldy
ASTANA. KAZINFORM — Mańǵystaý oblysynda turǵynnan aqsha bopsalady degen kúdikpen er adam ustaldy.
Mańǵystaý oblysy polıtsııa departamenti uıymdasqan qylmysqa qarsy kúres basqarmasynyń qyzmetkerleri JQAJ jaýyngerleri jáne UQKD qyzmetkerlerimen birlesip, aqsha bopsalaý dereginiń jolyn kesti.
Aldyn ala málimet boıynsha, kúdikti Aqtaý turǵynynan kúsh qoldanyp, qorqytý arqyly onyń bedeline nuqsan keltiretin málimetterdi taratpaý úshin aqsha talap etken.
— 1 qazanda júrgizilgen jedel-izdestirý is-sharalary barysynda kúdikti talap etilgen aqshanyń bir bóligin alǵannan keıin ustaldy. Jeke tintý kezinde odan arnaıy belgi qoıylǵan aqsha tabylyp, tárkilendi, — delingen habarlamada.
Atalǵan derek boıynsha QR Qylmystyq kodeksiniń 194-babynyń 2-bóligine sáıkes sotqa deıingi tergeý bastaldy. Kúdikti ýaqytsha ustaý ızolıatoryna qamaldy.
Qazir oqıǵanyń barlyq mán-jaıyn anyqtaýǵa baǵyttalǵan tergeý-jedel is-sharalary júrgizilip jatyr. Tergeý múddesine baılanysty ózge aqparat jarııalanbaıdy.
Eske salaıyq, buǵan deıin Qyzylordada kásipkerler men turǵyndardan aqsha bopsalaǵan top ustalǵanyn habarlaǵan edik.
