Aqtaýda turǵyn úı jertólesinde jarylys bolyp, 5 adam zardap shekti
AQTAÝ. KAZINFORM – Mańǵystaý oblystyq tótenshe jaǵdaılar departamentiniń habarlaýynsha, oqys oqıǵa boıynsha shaqyrtý búgin saǵat 09:03-te túsken.
- 28 qazan kúni saǵat 9:03-te 32-shaǵyn aýdandaǵy «Azııa» turǵyn úı kesheni 83-úıdiń jertólesinde gaz-aýa qospasynyń jarylǵany týraly sıgnal tústi. Bul jerge departamenttiń jeke quramynan 11 qyzmetkeri jáne 4 tehnıka bardy, - delingen habarlamada.
Mańǵystaý oblystyq densaýlyq saqtaý basqarmasynyń málimetinshe, aýrýhanaǵa 5 adam jetkizilgen. Onyń ekeýi - eresek, úsheýi - bala.
- Oqıǵa ornyna jedel medıtsınalyq kómek brıgadalary men Apattar medıtsınasy ortalyǵynyń ókilderi bardy. Oqıǵa saldarynan bes adam zardap shekti. Barlyq zardap shekkenderge qajetti medıtsınalyq kómek kórsetildi. Eki naýqas aýrýhanaǵa jatqyzyldy, úsheýi tekserýden keıin ambýlatorııalyq emdelýge jiberildi. Zardap shekkenderdiń jaǵdaıy turaqty dep baǵalanady. Óńirdiń jedel járdem jáne medıtsınalyq uıymdary shtattyq rejımde jumys isteıdi. Jaǵdaı oblystyq densaýlyq saqtaý basqarmasynyń baqylaýynda, - delingen habarlamada.
Atap aıtqand, 1973 jylǵy naýqastyń jaǵdaıy aýyr, denesin 50-55 paıyz kúıik shalǵan. Dárigerler ony jansaqtaý bólimine jatqyzdy. Ekinshi 2003 jylǵy azamatqa alǵashqy medıtsınalyq kómek kórsetilip, ambýlatorlyq em alý úshin úıine jiberilgen.
Al, oblystyq balalar aýrýhanasyna 3 adam jetkizilgen. Onyń biri - 15 jasar qyz gaz ıisinen ýlanǵan. Jasóspirimniń jaǵdaıy ortasha aýyr bolǵandyqtan, pedıatrııalyq bólimge jatqyzyldy. 7 jáne 10 jasar jetkinshekter dárigerdiń qaraýynan soń, aýrýhanaǵa jatýdan bas tartyp, ata-analarymen birge úılerine jiberilgen.
Buǵan deıin, Qostanaıda TJM qutqarýshylary gazdan ýlanǵan 2 adamdy jertóleden alyp shyqqan bolatyn.
Al, Oralda turǵyn úıdiń jertólesinen órt shyǵyp, 15 bala evakýatsııalandy.