Aqtaýda Tuńǵysh Prezıdent saıabaǵy salynyp jatyr

AQTAÝ. QazAqparat - Mańǵystaý oblysynyń ortalyǵy Aqtaýda óńirdegi eń iri saıabaq salynyp jatyr, dep habarlaıdy QazAqparat qala ákimdiginiń baspasóz qyzmetine silteme jasap.

40 shaǵynaýdanda ornalasqan saıabaqtyń aýmaǵy 23 gektar. Onda qala turǵyndarynyń belsendi demalýyna arnalǵan alańdar, serýendeý aımaqtary bolady. Gúlder alleıasy, mýzykalyq sýburqaq, balalar oıyn alańdary, júgirý jáne velosıped joldary da ornatylady.

Saıabaqtyń qurylysy «BS stroy» JShS-nyń jeke qarajaty esebinen turǵyzylýda.

Qazirgi tańda, demalys aýmaǵynyń jerine topyraq tóseý, tegisteý jumystary júrgizilip jatyr.

-Eń bastysy saıabaqtaǵy jasyl-jelekterdi sýarý úshin jerasty sýlary, al, jaryqtandyrý úshin kún sáýlesi paıdalanylady. ıAǵnı, qala boıynsha ınjenerlik jáne elektr jelilerine eshqandaı salmaq túspeıdi,-deıdi merdiger mekeme basshysy Suńǵat Muńalbaev.

Qurylysy 2023 tolyq aıaqtalady dep josparlanǵan saıabaqty kútip-ustaý jumystaryna da merdiger mekeme jaýapty bolmaq.