Aqtaýda tuńǵysh elektrobýstar jolǵa shyqty
AQTAÝ. QazAqparat - Aqtaýda alǵash ret áýejaıdan qalaǵa deıingi baǵytta elektrobýstar jolǵa shyqty, dep xabarlaıdy QazAqparat tilshisi.
Budan bylaı, atalmysh baǵytta qorshaǵan ortaǵa zııansyz kólikpen jolaýshylar tasymaldaıtyn bolady. Bir ereksheligi, «Tsıfrly Qazaqstan» memlekettik baǵdarlamasy aıasynda elektr avtobýstary elektrondy bılet berý júıesimen jabdyqtalǵan. Aqtaý qalasy atalǵan júıemen jabdyqtalǵan elimizdegi úshinshi qala. Jolaýshylar endi jolaqyny yńǵaıly tarıfter arqyly banktik jáne kóliktik kartalarmen tóleı alady.
«Bul avtokólikterdiń eń basty ereksheligi olardyń «jasyl texnologııalarǵa» sáıkes elektr qýatymen, ıaǵnı atmosferaǵa zııandy shyǵaryndylarsyz jumys isteýi. Sonymen qatar, qoldanysta bul avtobýstar únemdi: mysaly, dızeldi otynmen qozǵalatyn kóliktermen salystyrǵanda 4 ese jáne gazben qozǵalatyn kóliktermen salystyrǵanda 3 esege únemdi. Osynyń nátıjesinde avtobýstardyń ótelimdiligi 3-4 jyl bolyp tabylady. «SaryarqaAvtoProm» JShS avtobýstarǵa 2 jyldyq kepildik beredi, bul óz kezeginde qoldanystaǵy senimdilikti qamtamasyz etedi»- dedi Mańǵystaý oblysynyń ákimi Eraly Toǵjanov.
Al, elektrondy bıletter - «aqyldy qala» ınfraqurylymynyń bóligi jáne engizilýi ońaı bolyp tabylady. Ol bpcbillet.com portaly jáne avtobýstarǵa ornatylǵan bıletterdi basyp shyǵaratyn kópfýnktsıonaldy valıdatorlardan turady.
Elektr avtobýsynyń jıyntyǵynda birden eki elektr avtobýsyn qýat kózimen qamtamasyz ete alatyn turaqty elektr qýatynyń turaǵy bar.
«Bul bizdiń kompanııanyń ınnovatsııalyq avtokólikterdi qurastyrýda birinshi tájirıbesi jáne aldaǵy ýaqytta ekologııalyq taza kólikterdi qurastyrýǵa daıyn. Ankai zaýytynyń óndiristik qýaty jylyna 35 myń qalaishi, qalasyrty, ekskýrsııalyq, gaz ben elektr qýatynda júretin avtobýs óndirip shyǵarýǵa jetedi. Avtobýstardyń dál osy jıyntyǵy Besinshi Kaspıı sammıti delegattarynyń qoldanýyna jáne keıin Aqtaý qalasynda áleýmettik mańyzdylyǵy bar baǵyttar boıynsha qoldaný úshin jınaqtaldy. Jappaı suranys bolsa, bizder serııaly óndiriske jiberýge daıynbyz, - dedi avtobýsty qurastyrǵan «SaryarqaAvtoProm» JShS dırektory Mıxaıls Kvetnıs.
Aıta keteıik, 47 adamǵa arnalǵan Ankai jolaýshylar avtobýsy kondı júıesimen jabdyqtalǵan jáne qala syrty joldaryna beıimdelgen. Salonda 4 beınekamera, elektrondy avtoxabarlaýshy, sondaı-aq qol júgine arnalǵan sóreler bar. Oryndyq arqalaryna uıaly telefondar men ózge de elektr quraldaryn zarıadtaý maqsatynda USB tetikteri ornalasqan.
Jańa avtobýstardyń eń basty ereksheligi - elektr qýatymen qozǵalýynda, bul ekologııa úshin qaýipsiz jáne únemdi. Bir tolyq qýat alǵannan keıin jumys isteý kólemi 160 kılometrdi quraıdy. Batareıany tolyqtyrý úshin 2,5-4 saǵat mólsherindegi ýaqyt qajet.
