Aqtaýda tuńǵysh ret aýqymdy kitap festıvali bastaldy
ASTANA. KAZINFORM – Búgin Aqtaý qalasy ákimdiginiń qoldaýymen «Kitap kerýen — Aqtaý» kitap jármeńkesiniń saltanatty ashylýy ótti.
Aýqymdy mádenı sharaǵa Aqtaý qalasynyń ákimi Ábilqaıyr Baıpaqov, respýblıka jáne aımaqtyń belgili qalamgerleri men qoǵam qaıratkerleri, sondaı-aq kitap avtorlary men qala turǵyndary qatysty.
Іs-shara aıasynda qatysýshylar aldymen memleket jáne qoǵam qaıratkeri, kórnekti jazýshy Ábish Kekilbaevtyń eskertkishine gúl shoqtaryn qoıyp, rýhyna taǵzym etti. Odan keıin zııaly qaýym ókilderi Aqtaý qalasyn aralaýǵa arnaıy jasaqtalǵan, jas oqyrmandar otyrǵan avtobýsty saltanatty túrde shyǵaryp salyp, rýhanııat pen mádenı qundylyqtardy nasıhattaýǵa baǵyttalǵan kitap kerýeni men ádebıet kóshine sátti sapar tiledi.
Sharanyń negizgi bóliminde qonaqtar respýblıkalyq 10 baspanyń kitap kórmesimen tanysyp, jańa týyndylardy tamashalady. Aqtaý qalasynyń ákimi Ábilqaıyr Baıpaqov arnaıy kelgen mártebeli meımandarǵa alǵys bildirip, kitap festıvaliniń mańyzdylyǵyna erekshe toqtaldy.
— Qazaq elinde kitaptyń kerýeni eshqashan toqtaǵan emes. Bul ıgi kósh búginde Aqtaý qalasynda jalǵasyp, úlken rýhanı merekege ulasyp otyr. Osy sharaǵa arnaıy kelgen mártebeli meımandarymyzǵa shynaıy rızashylyǵymdy bildiremin. Jastar otyrǵan «Kitap kerýeni» avtobýsyn qala kóshelerin aralaýǵa shyǵaryp saldyq. Búgingi kitap merekesi joǵary deńgeıde uıymdastyrylyp otyr. Osyndaı taǵylymdy sharalar jalǵasyn taba bersin, — dedi qala ákimi Ábilqaıyr Baıpaqov.
Kitap festıvaline Roza Muqanova, Ońaıgúl Turjan, Kómek Ybyraev, Gúlaıym Dáýitbaeva, Anar Shamshadınova, Maqpal Mysa, Qanat Tileýhan, Ularbek Nurǵalym, Baqytgúl Sarmekova syndy qalamgerler, qoǵam qaıratkerleri men kitap avtorlary qatysýda. Baǵdarlama aıasynda oqyrmandar avtorlarmen júzdesip, estelik sýretke túsip, qoltańba qoıylǵan kitaptarǵa ıe bola alady. Sonymen qatar jańa kitaptardyń tusaýkeser rásimderi ótkizilip, túrli taqyryptaǵy sektsııalyq otyrystar uıymdastyrylady. Jármeńke barysynda tanymdyq oıyndar men oqyrmandarǵa arnalǵan mádenı-kópshilik is-sharalar da ótedi.
Aıta keteıik, «Kitap kerýen — Aqtaý» sharasy 15-16 mamyr kúnderi Q. Sydıyquly atyndaǵy ámbebap oblystyq kitaphanada keshki saǵat 18:00–ge deıin jalǵasady. Al sharanyń qorytyndy keshi erteń saǵat 16:00–de 14-shaǵynaýdandaǵy teńiz jaǵalaýynda uıymdastyrylady.
Aıta ketelik Astanada «Astana Eurasian Book Fair – 2026» halyqaralyq kitap kórmesi ótken edi.
