Aqtaýda tozyǵy jetken 15 úıdi súrip, ornyna 9 baspana salmaqshy
Aqtaýdyń 3-shaǵynaýdanyndaǵy tozyǵy jetken 15 turǵyn úıdi súrip tastap, ornyna 590 páterlik 9 úı salyný usynyldy, dep habarlaıdy Kazinform.
Aqtaý qalasynyń 3-shaǵynaýdanyndaǵy úılerdi jańartý ótken jyly bastalǵan. Buryn bul baǵdarlama «Apatty úıler» dep atalatyn. 3-shaǵynaýdandaǵy renovatsııa jumysyna jaýapty mekeme — «Qurylys stroı servıs» JShS.
Seriktestik 2014-2020 jyldary «Apatty úıler» baǵdarlamasy boıynsha 3-shaǵynaýdanda tozyǵy jetken 15 eki qabatty úıdi súrip, onyń ornyna 7 úı salǵan.
Bıyl bul mekeme 56 páterlik 2 turǵyn úı saldy. Bul úılerge eskirgen bes baspananyń turǵyndary kóshirildi.
Seriktestik dırektory Bekmurat Saqtaǵanov qala ákiminen renovatsııa arqyly salynǵan turǵyn úılerdiń ınfraqurylym máselesin sheshýdi surady.
— 2022-2026 jyldar aralyǵynda renovatsııa baǵdarlamasy aıasynda 3-shaǵynaýdandaǵy 15 tozyǵy jetken turǵyn úıdi súrip tastaý qajet. Onyń ornyna 590 páterlik 9 turǵyn úı salynady. Onyń ekeýiniń qurylysy bıyl aıaqtaldy. Bul jumys kezeń-kezeńimen júrgiziledi. Renovatsııa júrgizbes buryn tozyǵy jetken eki qabatty úı turǵyndarynyń pikirin bilý úshin arnaıy saýalnama alyndy. Sol saýalnamaǵa qaraı turǵyn úıdiń jobasy jasaldy. Endigi kezekte ınfraqurylym máselesin sheship berýińizdi suraımyn, — dedi «Qurylys stroı servıs» JShS dırektory Bekmurat Saqtaǵanov.
Qala ákimi atalǵan nysandaǵy ınfraqurylym máselesin sheshýdi jaýapty mekemelermen birge qarastyratynyn jetkizdi.
— Aqtaý qalasy boıynsha eski úılerge tehnıkalyq saraptama júrgizilip jatyr. Baspanasy tozǵan turǵyndarǵa eki usynys bar. Onyń biri — úıdi jóndeýge arnalǵan qaıtarymdy qarajat boıynsha «Nurly jer» memlekettik baǵdarlamasy, ekinshisi — renovatsııa. Renovatsııa — turǵyndar úshin óte tıimdi baǵdarlama. Al ınfraqurylym máselesi «KJSA» MKK jáne «AEJB» mekemelerimen birlesip sheshiledi, — dedi Aqtaý qalasynyń ákimi Ulyqbek Tnalıev.
Al bıyl 3-shaǵynaýdanda renovatsııa baǵdarlamasy boıynsha 190 páterlik eki turǵyn úıdiń qurylysy bastalady.
