Aqtaýda TikTok arqyly uıaly telefon satyp alýǵa qatysty alaıaqtyq isi qaraldy
ASTANA. KAZINFORM – Aqtaý qalasy prokýratýrasynyń bastamasymen qalalyq sotta ınternet-alaıaqtyq faktisi boıynsha ashyq sot otyrysy ótti. Іs Qylmystyq kodekstiń 190-babynyń 3-bóligi 4-tarmaǵy boıynsha qaraldy. Bul týraly Qazaqstan Bas prokýratýrasynyń baspasóz qyzmeti habarlady.
Bul is-shara jastar arasynda quqyqtyq saýattylyqty arttyrý jáne ınternet-alaıaqtyqtyń aldyn alý maqsatynda uıymdastyryldy. Sot otyrysyna joǵary oqý ornynyń stýdentteri qatysyp, sot protsesin baqylady.
Sot materıaldary boıynsha sottalýshy TikTok áleýmettik jelisinde tikeleı efır arqyly tómen baǵamen uıaly telefondar satatynyn jarııalap, azamattardy aldaǵany anyqtaldy. Jábirlenýshiler 25-70 myń teńge aralyǵynda aqsha aýdarǵanymen, ýáde etilgen telefondardy alǵan joq.
Nátıjesinde birneshe jábirlenýshige jalpy somasy 231 myń teńge kóleminde materıaldyq zalal keltirilgen. Sot úkimimen sottalýshy kináli dep tanylyp, zań talaptaryna sáıkes jaza taǵaıyndaldy.
Aqtaý qalasynyń prokýratýrasy azamattardy ınternet arqyly saýda jasaǵanda saq bolýǵa, kúmándi usynystarǵa senbeýge jáne tekserilmegen tulǵalarǵa aqsha aýdarmaýǵa keńes beredi.
Buǵan deıin alaıaq elordanyń 18 turǵynyn aldap soqqanyn jazǵan edik.
