Aqtaýda teńizdiń jaǵalaýynan óli aqqý tabyldy
AQTAÝ. KAZINFORM – Bul týraly turǵyndar áleýmettik jelide jazǵan. Aıtýlarynsha, 4A shaǵyn aýdandaǵy «Jartas soqpaqtary» jaǵalaýynda bir aqqý ólip jatyr, taǵy bireýi álsirep, usha almaı júr.
– Jergilikti turǵyndarǵa bul aýyr tıedi. Qustardyń, ıtbalyqtardyń ólimi jıilep ketti. Qanattylardyń ólimin mamandar tabıǵı jaǵdaı dep jyly jaba salady. Bul durys emes, tekserip, sebebin anyqtaý qajet, - deıdi áleýmettik jelide pikir qaldyrǵan Anatolıı esimdi turǵyn.
Mańǵystaý oblystyq ekologııa departamentiniń habarlaýynsha, 20-naýryzdaǵy sýdy synaý hattamasyna sáıkes, Kaspıı teńizi sýynyń quramynan lastaýshy zattar tabylmaǵan.
– 4A shaǵyn aýdandaǵy jaǵalaýdan tabylǵan óli aqqýǵa qatysty mamandar sý synamalaryn qaıtadan alyp, onyń quramyna hımııalyq taldaý júrgizedi, - delingen habarlamada.
Buǵan deıin, Aqtaýda 1-shaǵyn aýdan jaǵalaýynda jáne «Kók shyǵanaq» jaǵajaıynda qustar ólip jatqany týraly jazǵan edik.