Aqtaýda teńiz jaǵasynan tabylǵan qustardyń óleksesin mamandar zertteıdi
AQTAÝ. KAZINFORM — Bul týraly Orman sharýashylyǵy jáne janýarlar dúnıesi komıtetiniń oblystyq aýmaqtyq ınspektsııasy habarlady. Inspektorlar «Rixos» qonaq úıiniń janyndaǵy jaǵalaý syzyǵyn aınalyp ótip, bir aqqýdyń jáne alty úırektiń qańqasyn tapqan. Bul jaǵdaı týraly qala bıligi men «Rixos» ákimshiligine habar berilgen.
— Búgingi tańda Qarakól kólinde 10-nan astam aqqý men basqa qustar mekendeıdi. Bul jaǵdaıda Kaspıı jaǵalaýynda birneshe qustyń ólimi tabıǵı túrde qustardyń álsireýine baılanysty boldy, - delingen Orman sharýashylyǵy jáne janýarlar dúnıesi komıtetiniń oblystyq aýmaqtyq ınspektsııasy bergen habarlamada.
Inspektsııanyń habarlaýynsha, qustardyń jappaı qyrylýy tirkelmegen. Soǵan qaramastan Mıkrobıologııa jáne vırýsologııa ortalyǵynyń mamandary zertteý úshin óli aqqýlar men úırekterden synama alǵan. Nátıjeleri 10 qańtarǵa deıin daıyn bolady.
Sondaı-aq, vedomstvo qustardyń qus tumaýynyń saldarynan ólýi múmkin ekenin joqqa shyǵarmady.
Aıta keteıik, 2 qańtar kúni jergilikti turǵyn «Rixos» qonaqúıiniń janyndaǵy teńiz jaǵasynan ólgen qustardy taýyp, quzyrly organǵa habar bergen.
Buǵan deıin, Mańǵystaýda Kaspıı jaǵalaýynan bir myńǵa jýyq ıtbalyqtyń óleksesi tabylǵany týraly jazǵan bolatynbyz.