Aqtaýda teńiz jaǵalaýyndaǵy 3 kúndik shatyrly lager jumysyn bastady
AQTAÝ. KAZINFORM – Aqtaýda teńiz jaǵalaýyndaǵy «Baldáýren» balalar demalysy bazasynda úsh kúndik shatyrly lager demalýshylardy qabyldady.
Bilim basqarmasynyń habarlaýynsha, tórt aýysymdyq lager 1-14 tamyz aralyǵynda ótedi. Teńiz jaǵalaýyna kıiz úı úlgisinde alty shatyr tigilip, tórt mezgil tamaq uıymdastyrylýda.
– Lagerge daryndy oqýshylar, ekologııalyq jáne týrıstik, ólketaný baǵytyndaǵy respýblıkalyq, oblystyq is-sharalardyń jeńimpazdary, áleýmettik qoldaýǵa ıe otbasynyń balalary, barlyǵy – 400 oqýshy qamtylady. Lager baǵdarlamasyna sáıkes, balalar órtten, sýdan saqtaný qaýipsizdik erejelerimen, kartamen jumys isteý, kedergilerden ótý, shatyr tigý, alaý jaǵý, tótenshe jaǵdaılarda óz-ózine qyzmet kórsetý daǵdylaryn úırenedi, - deıdi bilim basqarmasynyń ókilderi.
Sondaı-aq demalýshylar «Taza jaǵalaý» ekologııalyq aktsııasyna atsalysyp, jaǵalaýda tazalyq jumystaryn júrgizedi.
Balalar lager aıasynda Qazaqstannyń eń tereń oıpatynda ornalasqan, tańǵajaıyp tabıǵattyń erekshe týyndysy labırıntter men arkalardyń álemine aınalǵan «Ybyqty-Saı» shatqalyna saıahatqa shyǵady.
