Aqtaýda teńiz jaǵalaýynda zańsyz qurylys anyqtaldy
ASTANA. KAZINFORM – Aqtaýda teńiz jaǵalaýyndaǵy jartasty soqpaq aýmaǵynda zańsyz qurylys faktisi tirkeldi. 4A shaǵyn aýdanyndaǵy jartastyń ústindegi jer ýchaskesi abattandyrý maqsatynda bólingen. Degenmen, kórshiles №36B ýchaskesiniń ıesi bul jerge belgisiz qurylymnyń irgetasyn qalaǵany anyqtaldy.
Aldyn ala aqparat boıynsha, qala turǵyndarynyń biri aýmaqta oryndyqtardyń joqtyǵyna shaǵymdanǵan. Ol qurylys jumystarynyń saldarynan tómengi bóliktegi oryndyqtar alynyp tastalǵan bolýy múmkin dep málimdegen.
Bul jaǵdaıǵa baılanysty Aqtaý ákimdigi tekserý júrgizip, qurylys zańsyz ekenin rastady. Jer ýchaskesi «Aqtaý qalalyq turǵyn úı-kommýnaldyq sharýashylyǵy bólimi» memlekettik mekemesiniń balansynda bolyp, abattandyrýǵa arnalǵan.
– Atalǵan derek boıynsha Aqtaý ákimdigi tıisti vızýaldy tekserý júrgizip, jartasta ornalasqan jer teliminde zańsyz qurylys nysanyn anyqtady. Osy zańsyz qurylysqa qatysty shara qabyldaý úshin Mańǵystaý oblysynyń memlekettik sáýlet-qurylys baqylaýy basqarmasyna hat joldandy. Qazirgi ýaqytta ýákiletti organnan qosymsha aqparat kútilýde, - dep habarlady Aqtaý ákimdigi.
Ákimdiktiń málimetinshe, buǵan deıin jartasty soqpaqta eki oryndyq pen tórt qoqys jáshigi bolǵan. Keıin olardy jańartý týraly sheshim qabyldanyp, ornyna tórt jańa oryndyq ornatylǵan. Bul sharalar aýmaqtyń qolaıly ári taza bolýyn qamtamasyz etýge baǵyttalǵan.
Budan buryn Aqtaýda kúkirtsýtek mólsheri normadan myń ese asyp ketkenin jazǵan bolatynbyz.
