Aqtaýda teńiz jaǵalaýynda egeýquıryq qaptap ketti
AQTAÝ. KAZINFORM — Aqtaýlyqtar jaǵalaýda egeýquıryq kóbeıip ketkenine shaǵymdanyp jatyr. Turǵyndardyń biri kemirgishterdi vıdeoǵa túsirip alǵan.
— Egeýquıryqtar óte kóp, olar tastardyń astynda qaptap júr. Nege olardy joımaıdy? Bul qaýipti jaǵdaı, sebebi egeýquıryqtar túrli ınfektsııalardy taratýy múmkin. Kórgenime shok boldym. Endi jaǵalaýda tastardyń ústinde otyryp, teńiz aýasymen tynystaý da múmkin emes, — deıdi qala turǵyny.
Turǵynnyń aıtýynsha, kemirgishter 14-shaǵyn aýdan jaǵalaýynda qaptap júr.
Aqtaý qalasy ákimdiginiń habarlaýynsha, kemirgishterdi ýlaý jumystary endi júrgiziledi.
— Qazirgi tańda, qala aýmaǵynyń keıbir shaǵyn aýdandarynda kemirgishter men egeýquıryqtardyń taralý derekteri anyqtalyp jatyr. Bul rette, anyqtalǵan kemirgishter men egeýquıryqtardy deratızatsııa (dezınfektsııa, dezınsektsııa) jolymen joıý maqsatynda ýlaý jumystaryn júrgizý úshin memlekettik satyp alý konkýrstyq issharalary júrgizildi.
Júrgiziletin ýlaý jumystary sheńberinde Samal teńiz jaǵalaýynan bastap «Aqtaý» teńiz portyna deıingi irgeles aýmaqqa, 16, 17, 18, 18a, 19, 19a, 20, 20a shaǵyn aýdandarynda jáne qala aýmaǵynda ornalasqan barlyq balalar oıyn alańyna, sondaı-aq «Aqjelken» eldi mekeni men Ómirzaq aýylynda júrgiziledi, — delingen habarlamada.
Memlekettik satyp alý konkýrstyq is-sharalarynyń nátıjesinde «Dezınfektsııa Nur-Arý» JShS merdiger retinde tanylǵan. Kelisimshart quny — 14 964 000 teńge. Merdiger ýlaý jumystaryn kóktem jáne kúz aılarynda júrgizedi.
Buǵan deıin, Aqtaýda kópqabatty turǵyn úıdiń jertólesinde egeýquıryq qaptap ketken bolatyn.
