Aqtaýda teńiz jaǵalaýyna salynǵan zańsyz aılaq demontajdalyp jatyr
AQTAÝ. KAZINFORM — Aqtaýda 4A shaǵyn aýdanyndaǵy teńiz jaǵalaýy aýmaǵynda zańsyz salynǵan qaıyq aılaǵy anyqtaldy.
Aqtaý qalasy ákimdigi baspasóz qyzmetiniń málimetinshe, jaǵalaý aýmaǵynda júrgizilgen monıtorıng jáne baqylaý jumystary barysynda kásipkerdiń tıisti ruqsat qujattarynsyz qaıyq aılaǵyn ornatqany belgili bolǵan.
— Anyqtalǵan zań buzýǵa baılanysty kásipkerge qoldanystaǵy zańnama talaptaryna sáıkes eskertý jasalyp, kemshilikterdi belgilengen merzimde joıý týraly nusqama berildi. Sondaı-aq nysan ornalasqan aýmaqty bastapqy qalpyna keltirý, zańsyz ornatylǵan qurylymdardy demontajdaý, jaǵalaý beldeýin abattandyrý jáne sanıtarlyq talaptardy saqtaý mindetteldi, — deıdi Aqtaý qalasy ákimdigi baspasóz qyzmeti.
Qazirgi tańda atalǵan aýmaqta aılaqty buzý jumystary bastalǵan.
Osy oqıǵadan keıin qala ákimdigi jer ýchaskelerin, jaǵalaý aımaqtaryn jáne qoǵamdyq keńistikterdi zańsyz ıgerýge, sondaı-aq ruqsatsyz qurylys jumystaryn júrgizýge jol berilmeıtinin eske saldy. Al, zań talaptaryn buzǵandarǵa tıisti ákimshilik sharalar qoldanylmaq.
Buǵan deıin, Aqtaýda jetkinshek jaǵajaıdaǵy batpaqqa batyp kete jazdaǵan bolatyn.
