Aqtaýda teńiz betinde maıly daqtar men qoqys qalqyp júr

AQTAÝ. KAZINFORM — Aqtaý turǵyndary jaǵalaý aımaǵynyń jaǵdaıyna alańdap, ekologııalyq ahýaldyń nasharlaýyna nazar aýdarýǵa shaqyrǵan, dep jazdy Lada.kz.

Qala turǵyny túsirgen vıdeodan teńiz betiniń lastanǵany anyq kórinedi. Kýágerlerdiń aıtýynsha, 15-shaǵyn aýdan mańynda teńiz sýynyń betinde maıly daqtar men qalqyp júrgen qoqys baıqalǵan.

– Bireý ádeıi qaldyq tastaǵandaı. Shamamen 40 mınýt buryn sý tap-taza edi, qazir múlde shomylýǵa kelmeıdi, – deıdi Aqtaý turǵyny.

Bul máselege baılanysty Kazinform agenttigi Mańǵystaý oblystyq ekologııa departamentine resmı saýal joldady.

Aıta keteıik, 2025 jyldyń mamyr aıynyń basynan beri Eýropalyq ǵarysh agenttiginiń Sentinel-1A jáne Sentinel-1C spýtnıkteri Kaspıı teńizinde aptasyna bir ret munaı qaldyqtary bar daqtardy tirkegen edi. 

Buǵan deıin Fort-Shevchenko qalasynyń mańynda, Túpqaraǵan aýdanynda Kaspıı teńiziniń jaǵalaýynan óli balyqtar tabylǵan bolatyn. Aldyn ala málimet boıynsha, olardyń jappaı qyrylýyna teńiz sýynyń temperatýrasynyń kúrt kóterilýi jáne sýdaǵy ottegi deńgeıiniń tómendeýi sebep bolǵan.