Aqtaýda «Tennıs ortalyǵynda» provızorlyq statsıonar jasaqtaldy
Naýqastardyń kóptigine oraı Beıneý aýdany men Jańaózen jáne Aqtaý qalalaryna basymdyq berilýde,-dep habarlaıdy QazAqparat.
Koronavırýstyq pandemııanyń qazirgi órshý satysynda pnevmonııanyń kóbeıip bara jatqandyǵy baıqalyp otyr.
Dárigerlerdiń aıtýynsha, naýryz aıynda dene qyzýy kóterilip aýyrǵan naýqastar 14 kúnniń ishinde jazylyp ketken bolsa, qazirgi kezde vırýs birden adamdardyń ókpesine túsip, pnevmonııamen aýrǵandardyń sany kóbeıip ketti. Osyǵan qaraı aımaq basshylaryna buryn daıyndaǵan ártúrli statsıonarlardy ókpe qabynýyn emdeýge arnap qaıta jabdyqtaýyna týra keldi.
Mańǵystaýdaǵy barlyq qala men aýdandardaǵy pýlmonologııalyq provızorlardaǵy oryndardyń sanyn arttyrý baǵytynda jumystar júrgizilýde. Naýqastardyń kóptigine oraı Beıneý aýdany men Jańaózen jáne Aqtaý qalalaryna basymdyq berilýde. Mysaly, Beıneý aýdanynyń ortalyǵynda 55 oryndyq provızorlyq statsıonar daıyndaldy. Jańaózende 75 oryndyq provızorlyq ortalyq ázirlendi.
Al, Aqtaýda naýqastar sany kóp. Sebebi qalaǵa irgeles jatqan Munaıly aýdanynyń, Túpqaraǵan men Qaraqııa aýdandarynyń turǵyndary da oblys ortalyǵyna kelip, shaǵymdaryn bildiredi. Osyǵan baılanysty Aqtaýda 4 birdeı pýlmonologııalyq provızor ortalyǵy iske qosyldy.
Birinshisi - Aqtaýdaǵy 1-shaǵyn aýdanda ornalasqan burynǵy qalalyq perzenthanada jasaqtalǵan 100 oryndyq provızorlyq gospıtal;
Ekinshisi – 1-shaǵyn aýdandaǵy burynǵy týberkýlezge qarsy dıspanserdiń bazasynda ashylǵan 100 oryndyq provızorlyq gospıtal, úshinshisi - oblystyq aýrýhananyń «B» blogynda qurylǵan 300 oryndyq provızorlyq ortalyq (munda qazir 75 oryn bos tur), tórtinshisi – «Prımorskıı» shaǵyn aýdanyndaǵy jaǵajaıda ornalasqan «Tennıs ortalyǵynda» 150 oryndyq provızorlyq statsıonar jasaqtaldy. Bul ortalyq qazir naýqastardy qabyldaýǵa tolyq daıyn, kómek kórsetetin medıtsınalyq qyzmetkerler de bólindi»,-deıdi aımaq basshylary.
Aıta keteıik, sondaı-aq oblystyq aýrýhanadaǵy jóndeý jumystary aıaqtalǵan soń, 5-6 qabattarynan 150 oryn provızorlyq statsıonar ashylady.
«Jaman aıtpaı jaqsy joq, jaǵdaı kúrdelenip, naýqastar sany artatyn bolsa, oblys deńgeıinde áleýmettik nysandarda ýaqytsha provızorlyq ortalyqtar jasaqtaýǵa múmkindik bar. Barlyq provızorlyq statsıonarlar qajetti medıtsınalyq qural-jabdyqtarmen, qorǵanysh quraldarymen jáne dári-dármektermen qamtylatyn bolady. Ol jerde jumys isteıtin dárigerlerge jaǵdaı jasalyp, qonaqúılerge ornalastyrylmaq»,-deıdi oblys basshylary.