Aqtaýda teńizge sekirgen jigitti dárigerler aman alyp qaldy

AQTAÝ. QazAqparat – Búgin, 1 qańtarda Mańǵystaý oblysynyń shuǵyl jáne jedel medıtsınalyq járdem stantsııasyna (103 qyzmeti) shaqyrtý túsken. Belgili bolǵandaı, spırttik ishimdik ishken 30 jastaǵy qala turǵyny Kaspıı teńizine sekirip, sýǵa batyp kete jazdaǵan, dep habarlaıdy egemen.kz saıty Mańǵystaý oblystyq densaýlyq saqtaý basqarmasy baspasóz qyzmetine silteme jasap.

Oqıǵa Aqtaý qalasynda 4-shaǵynaýdandaǵy «Tastaqty soqpaq» (Skalnaıa tropa) aýmaǵynda oryn alǵan. «Jedel járdem» brıgadasy oqıǵa ornyna 4 mınýtta jetken.

Aldyn ala «Aspıratsııalyq sındrom» dıagnozy qoıylǵan. Baspasóz qyzmetiniń málimetinshe, brıgada quramynda bolǵan dáriger Áıgerim Salı men feldsher Samat Temirhanovtyń jedel áreket etýiniń jáne kásibıliginiń arqasynda teńizge batýǵa sál qalǵan azamat aman qaldy.

«Jedel járdem» brıgadasy kele salysymen algorıtm boıynsha 10 mınýt ishinde júrek-ókpe qyzmetine reanımatsııa jasady. Shuǵyl árekettiń arqasynda beti beri qaraǵan jigit oblystyq aýrýhanaǵa jetkizildi. Aýrýǵa ınemen tamshylatyp dári engizildi, jalpy qan taldaýy, bıohımııa, qursaq qýysyna ÝZI jasalyndy.

Hırýrg-terapevt jáne travmotolog qarap, qajetti dári-dármegin jazyp bergen soń aýrýhanada jatyp em alýdan bas tartyp, óz erkimen úıine qaıtyp ketken.

Aıta ketý kerek, ne sebepti onyń sýǵa sekirgeni ázirge belgisiz jáne bul máseleniń mán-jaıyn endigi jerde polıtsııa organdary anyqtamaq.