Aqtaýda teńizge batyp ketken bozbalanyń denesi tabyldy

NUR-SULTAN. QazAqparat – Kaspıı teńizine batyp ketken kolledj stýdentiniń denesi 6 m tereńdikten shyǵaryldy. Bul týraly oblystyq tótenshe jaǵdaılar departamentiniń mamandary málim etti, dep habarlaıdy QazAqparat.

«Departamenttiń 20 qyzmetkeri 2 tehnıka jáne 2 júzý quraly, 1-gıdraskýtordyń kómegimen 2004 jyly týǵan jigitke izdeý júrgizdi. Saǵat 07:33-te TJD JQB kúshimen jigittiń denesi sýdan tabyldy», - dep málimdedi oblystyq TJD baspasóz qyzmeti.

Eske salsaq, 7 maýsym kúni saǵat 16:20 kezinde qutqarý qyzmetine Aqtaý qalasy Samal-2 yqshamaýdanynda bir adamnyń sýǵa ketkeni týraly habar túsken edi. Aqtaý qalasy tótenshe jaǵdaılar basqarmasy azamattyq qorǵanys tobynyń ofıtseri, aǵa leıtenant Azamat Tólegenovtiń aıtýynsha, úsh jigit pırsten teńizge sekirgen. Ekeýi jaǵaǵa júzip shyqqan, al bireýi batyp ketken.