Aqtaýda teńiz jaǵasynan úlken ıgýana tabyldy

AQTAÝ. QazAqparat - Áleýmettik jelide taralǵan vıdeo avtory teńiz jaǵasynan denesi tabylǵan úlken kesirtkeni túsirip, onyń qandaı baýyrmen jorǵalaýshy jáne sýǵa qalaı tap bolǵanyn surady, dep habarlaıdy QazAqparat tilshisi.

Bul týraly qaladaǵy ekolog Kırıl Osın pikirin bildirdi. Onyń aıtýynsha, vıdeodaǵy jándik - ıgýana tuqymdasyna jatatyn kesirtke.

«Bul - baýyrymen jorǵalaýshylar klasy, qabyrshaqtylar otrıady, ıgýana tuqymdasyna jatatyn eń úlken kesirtkelerdiń biri. Igýana - uzaq evolıýtsııalyq ózgeristerden ótken ejelgi tuqymdastar. Olardyń dınozavrǵa uqsaıtyny da sondyqtan. Teńiz jaǵalaýynda jatqanyna qaraǵanda Aqtaý turǵyny páterinde asyraǵan bolýy kerek. Ólip qalǵan soń munda ákelip laqtyryp ketken. Negizi ıgýanalar aǵashta ómir súredi. Búgingi tańda keıbireýler ekzotıkalyq janýarlardy úıinde ósiredi. Bul durys emes. Muny qadaǵalaıtyn zań qabyldanbaǵandyqtan adamdar oıyna kelgenin jasaıdy», - deıdi Kırıll Osın.