Aqtaýda tehnıkalyq reglamentke saı kelmeıtin dızel otyny tárkilendi

ASTANA. KAZINFORM –  Mańǵystaý oblysy boıynsha tehnıkalyq retteý jáne metrologııa departamentiniń ınspektorlary baqylaý maqsatynda satyp alý barysynda belgilengen qaýipsizdik talaptaryna sáıkes kelmeıtin dızel otynyn satý faktisin anyqtady.

— Zerthanalyq synaqtardyń nátıjeleri boıynsha DT-L-K4 markaly dızel otyny Keden odaǵynyń «Avtomobıl jáne avıatsııalyq benzınge, dızel jáne keme otynyna, reaktıvti qozǵaltqyshtarǵa arnalǵan otynǵa jáne mazýtqa qoıylatyn talaptar týraly» TR TS 013/2011 tehnıkalyq reglamentiniń talaptaryna sáıkes kelmeıtini anyqtaldy. Atap aıtqanda, tekserilgen ónimdegi kúkirttiń massalyq úlesi 115 mg/kg, al ruqsat etilgen norma 50 mg/kg-dan aspaýy tıis, bul belgilengen kórsetkishten 65 mg/kg-ǵa artyq ekenin kórsetedi, — delingen Saýda jáne ıntegratsııa mınıstrliginiń habarlamasynda.

Anyqtalǵan zań buzýǵa baılanysty ýákiletti organ sotqa talap aryz joldady.

— Mańǵystaý oblysynyń mamandandyrylǵan aýdanaralyq ekonomıkalyq sotynyń 2025 jylǵy 19 qarashadaǵy sheshimimen talap aryz tolyq kólemde qanaǵattandyryldy. Sot kásipkerlik sýbektisin tehnıkalyq reglament talaptaryna sáıkes kelmeıtin DT-L-K4 markaly dızel otynynyń tárkilengen ónimin ıelený, paıdalaný jáne (nemese) oǵan bılik etý quqyǵynan aıyrý týraly sheshim qabyldady, — delingen mınıstrlik habarlamasynda.

Sot aktisine sáıkes, kórsetilgen ónim ýákiletti organnyń talaptaryn jáne qoldanystaǵy zańnamany saqtaı otyryp, ıesiniń óz qarajaty esebinen joıýǵa, kádege jaratýǵa nemese qaıta óńdeýge, ne Qazaqstan Respýblıkasynyń aýmaǵynan tys jerge shyǵarýǵa jatady.

Baqylaý maqsatynda satyp alýdy júrgizý tutynýshylardyń quqyqtaryn qorǵaýǵa, azamattardyń qaýipsizdigin qamtamasyz etýge jáne munaı ónimderi naryǵynda tehnıkalyq retteýdiń mindetti talaptarynyń saqtalýyn qamtamasyz etýge baǵyttalǵan. 

Aıta ketelik eldegi benzın, dızel jáne avtogaz baǵasy týraly jazǵan edik.