Aqtaýda tegin balmuzdaq taratqan kásipker jaýapkershilikke tartylady
AQTAÝ. KAZINFORM — Oqıǵa balalar merekesine oraı uıymdastyrylǵan. 29-shaǵyn aýdanda ornalasqan «Abu Baby» balalar kıim dúkeniniń ıesi azyq-túlik pen syılyqtardy tegin taratqan.
Soǵan baılanysty turǵyndar kóp jınalyp, bir-birin qysyp, taptalyp qala jazdaǵan. Balalar adasyp, qoǵamdyq tártip buzylǵan.
Aqtaý qalasy ákiminiń baspasóz qyzmetiniń habarlaýynsha, kásipker atalǵan sharany jergilikti atqarýshy organǵa aldyn ala habarlamaǵan.
— Sondyqtan dúken ıesine Qazaqstan Respýblıkasynyń Ákimshilik quqyq buzýshylyq týraly kodeksiniń 488-1 babyna sáıkes (qoǵamdyq is-sharany habarlamaı ne kelisim almaı ótkizý) 20 aılyq eseptik kórsetkish mólsherinde aıyppul salynady, — delingen habarlamada.
Eske sala keteıik, azamattardyń jappaı qatysýymen ótkiziletin kez kelgen is-sharalar, sonyń ishinde qaıyrymdylyq aktsııalary, azyq-túlik pen syılyqtardy taratý syndy is-sharalar qoǵamdyq oryndarda ótkiziletin jaǵdaıda, Qazaqstan Respýblıkasynyń qoldanystaǵy zańnamasyna sáıkes, tıisti eldi mekenniń ákimdigimen mindetti túrde aldyn ala kelisilýi qajet.
Buǵan deıin, Aqtaý teńiz-saýda portynyń basshysy ustalǵanyn jazǵanbyz.