Aqtaýda tegin zattar dúkeni ashylady
MAŃǴYSTAÝ OBLYSY. QazAqparat - Aqtaý qalasynda áleýmettik az qamtamasyz etilgen jandarǵa arnalǵan qaıyrymdylyq dúkeni ashylady. Muqtaj jandar dúńgirshekten azyq-túlik, kıim-keshek, ydys-aıaq pen basqa da qajettilikterin tegin ala alady, dep habarlaıdy QazAqparat tilshisi.
Eriktiler qazir azyq-túlik pen turmysqa qajetti kerek-jaraqtyń jınalyp jatqanyn habarlaıdy. Ásirese, balalarǵa arnalǵan kıim-keshekter, kilemder men tósenishter kerek.
Aımaqtaǵy 70 otbasy dúkenge kelip, kómektiń kórsetilýine aldyn-ala ótinish bildirgen.
«Biz adambyz, bir birgemiz» qoǵamdyq qorynyń basshysy, joba jetekshisi Imanǵazy Dosmuhanbetovtiń aıtýynsha, dúkenge birinshi ret kelgenderdiń barlyǵyna birdeı járdem kórsetiledi. Al kómekti turaqty qajet etetinderdiń turmystyq jaǵdaıy aldymen tekseriledi.
«Biz eriktiler tobymen ár otbasyǵa baryp, jaǵdaılaryn qarap, tekserip jatyrmyz. Tipti, balalaryn asyraýǵa shamasy bolmaǵan januıalardy kezdestirdik. Olardy ońaltý ortalyǵyna apardyq. Biz ultqa, dinge qarap bólmeımiz. Bastysy - kómek kórsetý. Mundaı saýapty is kez kelgenniń kóńiline qýanysh syılaıdy. Aqtaýlyqtarǵa rızamyn. Qajetti zattardy jınaýda. Jyl saıyn muqtaj otbasylardy ózimiz izdep kómek kórsetýshi edik, endi bul bastama barlyǵyn qamtýǵa taptyrmaıtyn múmkindik. Sharaǵa atsalysamyn degenderge esigimiz árdaıym ashyq», - deıdi ol.
Dúken 8 naýryz kúni ashylady dep kútilýde.
