Aqtaýda sýǵa ketken eki adamnyń biriniń denesi tabyldy

AQTAÝ. QazAqparat - Qutqarýshylar 5 shilde kúni «Shora» kanalyna shomylýǵa ketip, qaıtyp oralmaǵan 25 jastaǵy jigittiń denesin tapty, dep habarlaıdy QazAqparat tilshisi.

10 jastaǵy Ábýǵalı Erkebulandy izdestirý áli jalǵasýda. Bul týraly Tótenshe jaǵdaılar departamentiniń jedel-qutqarý jasaǵy málimdedi.

Qutqarýshylar 25 jastaǵy Tolbaı Seriktiń denesin búgin shamamen saǵat 11-lerde «Shora» kanalynyń boıynan tapqan.

Eske sala keteıik, 5 shilde kúni 2 aǵaıyndy jigittiń qala shetinen 25 shaqyrymda ornalasqan «Shora» kanalynda shomylýǵa ketip, oralmaǵanyn jazǵan bolatynbyz. Olardyń qasynda bolǵan 21 jastaǵy áıeldi jergilikti polıtsııa qyzmetkerleri qutqaryp qalǵan.

Osy «Shora» sý kanaly aýmaǵynda byltyr da bir adam ajal qushty.

Budan bólek, Aqtaýdaǵy 4-shaǵyn aýdandaǵy jaǵalaý asa qaýipti sanalady. Alaıda, munda da eskertý taqtaıshalaryna qarap jatqan eshkim joq. Jasóspirimder men balalardyń bári osynda shomylady. Al, Aqtaý qalasynan 43 jáne 64 shaqyrymdaǵy jaǵalaý da adam ómiri úshin qaterli.

Aıta keteıik, shomylý maýsymy bastalǵaly oblysta 7 adam sýǵa ketti.