Aqtaýda stomatologııalyq emnen keıin 9 jasar balanyń jaq súıegi zaqymdandy
AQTAÝ. KAZINFORM — Aqtaýda 9 jastaǵy bala tisin emdetkennen keıin aýyr asqynýǵa ushyraǵan. Balanyń anasy Aqmaral Qaljanovanyń aıtýynsha, emnen keıin ulynyń tómengi jaq súıeginiń 60-70 paıyzy zaqymdanǵan.
Aqmaral Qaljanovanyń sózinshe, 2026 jyldyń aqpan aıynda ol ulyn profılaktıkalyq tekserýden ótkizý úshin oblystyq stomatologııalyq ortalyqqa aparǵan. Anasynyń aıtýynsha, balany aldyn ala rentgen tekserýinen ótkizbeı, anestezııamen tis emdeýge jibergen. Protsedýradan keıin tis jabylmaı, kelesi qabyldaý eki aptadan keıinge qalǵan. Keıin balanyń tisine birneshe ret myshıak pastasy salynǵan. Osydan soń jetkinshektiń tisi qatty aýyryp, beti isingen.
Keıin balanyń jaǵdaıy kúrt nasharlap, irińdi-qabyný protsesi bastalǵan. Astanada oǵan tómengi jaq súıeginiń osteomıelıti jáne súıek sekvestri dıagnoz qoıylǵan. Eki ret operatsııa jasalyp, zaqymdanǵan súıek tininiń shamamen 15 gramy alynǵan.
Qazir bala tamaqty qalypty shaınaı almaıdy, tek usaqtalǵan taǵammen qorektenedi. Anasynyń aıtýynsha, jaq súıegin tolyq qalpyna keltirý operatsııasyn bala eseıgen kezde ǵana jasaýǵa bolady.
Osy oqıǵaǵa qatysty Mańǵystaý oblystyq densaýlyq saqtaý basqarmasy ishki qyzmettik tekserý qorytyndysy boıynsha eki stomatologqa sógis jarııalanǵanyn habarlady.
Alaıda balanyń anasy bul sheshimmen kelispeı, polıtsııa departamentine aryz bergen.
Mańǵystaý oblystyq polıtsııa departamentiniń baspasóz qyzmeti atalǵan derek boıynsha qylmystyq is qozǵalǵanyn jetkizdi.
Buǵan deıin, Mańǵystaýda aýyr júk kólikterine jazǵy shekteý engizilgenin jazǵan bolatynbyz.
