Aqtaýda sport salasynyń úzdikteri marapattaldy
AQTAÝ. QazAqparat - Búgin oblys ákimi Eraly Toǵjanov Mańǵystaýdaǵy sport salasynyń úzdikterin marapattady, dep habarlaıdy óńir basshysynyń baspasóz qyzmeti.
Bıyl aımaqta kásipkerlerdiń qarajatynan 8 sport kesheni men 20 ashyq sport alańdary salynǵan. Segiz aýylda «Jas batyr» sport mektebiniń fılıaldary ashyldy. 
Keler jyly memlekettik-jekeshelik áriptestikpen Muz saraıy men boks ortalyǵy qurylysy bastalmaq. Sonymen qatar ústel tennısi ortalyǵy men barlyq aýdandarda dene shynyqtyrý - saýyqtyrý kesheni salynady. Aqtaý qalasynda yqshamaýdandardaǵy 15 oıyn alańyn jóndeýden ótkizý josparlanǵan.
Saltanatty sharada sóz alǵan aımaq basshysy Eraly Toǵjanov: «2017 jyl aımaǵymyzda eleýli oqıǵalarymen erekshelendi. Sport salasy da jańa bastamalarǵa toly jyl boldy. Oblysymyzda dzıýdo, sambo kúresiniń, karate-do, kıkboksıngtiń qarqyndy damyp kele jatqany qýantady. Ózderińiz bilesizder, Mańǵystaýdyń tarıhynda jastar men jasóspirimder arasynda sambo kúresinen Álem chempıony Ramazan Mamaev, dzıýdoan Azııa jáne Eýropa kýboginiń chempıony Suńǵat Jubatqan, karate-dodan Erkinbek Baıtórıev Álem chempıony atansa, Horvatııada jastar arasynda dzıýdodan ótken Álem chempıonatynyń tuńǵysh qola júldesin jerlesimiz Baýyrjan Narbaev ıelendi. Odan bólek óńirimizdiń úsh jattyqtyrýshysy «QR Eńbegi sińirgen jattyqtyrýshy» ataǵyn abyroımen qorǵady. Jalpy oblysymyzda turaqty sportpen aınalysatyndardyń sany 30%-dan asty.
Elbasynyń «Bolashaqqa baǵdar, rýhanı jańǵyrý» maqalasynda «Týǵan jer» baǵdarlamasy boıynsha ár adam óz aýylynyń kórkeıýine úles qosýy kerektigin aıtqan bolatyn. Osy baǵytta da metsenat azamattar ózderiniń týǵan aýyldarynda sport keshenderin óz qarajattary esebinen turǵyzyp, aýyldyq jerlerde de jastardyń sportpen aınalysýyna jaǵdaı jasaýda. Bul ıgi bastamalar keler jyly da jalǵasyn tabady dep senemiz»,-dedi.
Budan soń sportshylarǵa marapattar tabystaldy. Qazaqstan Respýblıkasy Mádenıet jáne sport mınıstrliginiń «Dene shynyqtyrý men sportty damytýǵa sińirgen eńbegi úshin» tósbelgisimen Qaraqııa aýdandyq mádenıet, dene shynyqtyrý jáne sport bóliminiń basshysy Dúısenbaı Ataǵaraev jáne Mańǵystaý oblystyq Olımpıadalyq daıarlaý ortalyǵynyń dırektory Qanat Ozǵanbaev; Qazaqstan Respýblıkasy Mádenıet jáne sport mınıstrliginiń «Qurmetti sport qyzmetkeri» tósbelgisimen Mańǵystaý oblystyq dene shynyqtyrý jáne sport basqarmasy basshysynyń orynbasary Nurbek Qaraballaev; Qazaqstan Respýblıkasyna Eńbek sińirgen jattyqtyrýshysy medalimen taekvondodan jattyqtyrýshy Ǵanı Ibragımov, bokstan jattyqtyrýshy Jaras Kalımov, kıkboksıngten jattyqtyrýshy Esenmurat Selıkov; sport salasyn damytýǵa qosqan úlesi úshin «Jomart júrek» nomınatsııasymen Sarsenbaı Abdýllaev; sport salasy boıynsha «Jyldyń úzdik aýdany» nomınatsııasymen Mańǵystaý aýdany marapattaldy.
Sondaı-aq, osy salanyń damýyna súbeli úles qosqan 70-ke jýyq azamatqa Mańǵystaý oblysy ákiminiń alǵys haty berildi.
Shara sońy óńirdiń óner juldyzdary men sportshylar qatysqan merekelik kontsertke jalǵasty.
