Aqtaýda sot banktiń qaryzǵa qyzmet kórsetý úshin ustaǵan komıssııalaryn zańsyz dep tanydy
ASTANA. QazAqparat - Mańǵystaý oblysyndaǵy Aqtaý qalasynyń №2 sotynda azamat H.-nyń bank arasyndaǵy zaem kelisim shartynyń qaryzǵa qyzmet kórsetý úshin komıssııa tóleý týraly bóligin zańsyz dep taný jáne ustalǵan komıssııany keıin qaıtarý jónindegi talap aryzymen azamattyq is qaraldy.
H. men bank arasynda 2015 jyly bank zaemy týraly kelisim shart jasaqtalyp, bank H-ǵa tutynýshylyq maqsatta 1 000 000 teńge nesıe bergen. Alaıda talapker aı saıyn qaryzǵa qyzmet kórsetkeni úshin bankke 5 000 teńge mólsherinde qosymsha komıssııa tólep otyrǵany anyqtaldy, dep habarlaıdy Mańǵystaý oblystyq sotynyń baspasóz qyzmeti.
Sot sheshimimen azamat H.-nyń talaby qanaǵattandyrylyp, qaryzǵa qyzmet kórsetkeni úshin talapkerden ustalǵan 120 000 teńge komıssııa tólemi talapkerge qaıtaryldy.
Sot quqyqtyq normalardyń talaptaryna sáıkes, talapkerdiń talaby zańdy jáne negizdi, al bank talapkerge aı saıyn qaryzǵa qyzmet kórsetý úshin komıssııa tóleýdi mindettep, talapkerdiń tutynýshy retinde quqyǵyn buzdy dep sanaıdy.
Sot sheshimi zańdy kúshine engen joq.
