Aqtaýda sırek jasalatyn kúrdeli neırohırýrgııalyq ota sátti ótti

ASTANA. KAZINFORM — Mańǵystaý oblystyq kópbeıindi aýrýhanasynda neırohırýrgııa salasyndaǵy sırek ári joǵary kásibı sheberlikti talap etetin oksıpıtospondılodez operatsııasy sátti jasaldy. Kúrdeli ota jol-kólik oqıǵasy saldarynan aýyr jaraqat alǵan naýqasqa júrgizildi. Bul týraly DSM baspasóz qyzmeti habarlady. 

Naýqasta odontoıdty ósindi (S1) men ekinshi moıyn omyrtqasynyń doǵasy (S2) synǵan. Jaraqattyń aýyrlyǵyna baılanysty ol alǵashqy kúni klınıkalyq ólim jaǵdaıyna túsken. Osyǵan oraı naýqas jedel túrde jansaqtaý bólimine jatqyzylyp, dárigerlerdiń turaqty baqylaýyna alyndy.

Neırohırýrgııa bólimshesiniń meńgerýshisi Dýman Moldabekuly Myrzabekovtiń aıtýynsha, S1–S2 deńgeıindegi jaraqat ómirge asa qaýipti.

— Bul aımaqta mı baǵanasy ornalasqan. Ol tynys alý, júrek soǵysy, qozǵalys pen sezimtaldyqty basqarady. Omyrtqanyń osy bóligindegi kez kelgen qozǵalys julynnyń zaqymdalýyna jáne aýyr saldarǵa ákelýi múmkin, — dedi ol.

Ota barysynda S1 jáne S2 omyrtqalary zaqymdalǵandyqtan, bekitý jelke súıegi men onyń astyndaǵy saý moıyn omyrtqalary arqyly júrgizildi. Búıirlik massalardyń shaǵyn bolýy standartty burandalardy ornatýǵa múmkindik bermegen.

— Sondyqtan asımmetrııalyq ári joǵary dáldikti talap etetin bekitý ádisin qoldanýǵa týra keldi. Bul tásil naýqasty erte qozǵalysqa keltirýge múmkindik beredi,
— dep túsindirdi dáriger.

Operatsııa sátti ótip, naýqas otadan keıingi alǵashqy kúni ókpeni jasandy jeldetý apparatynan ajyratyldy. Al kelesi kúni ózdiginen júre bastady. Qazirgi tańda ol aýrýhananyń ońaltý bóliminde qımyl-qozǵalysty qalpyna keltirý jattyǵýlaryn jasap, qarqyndy em qabyldap jatyr.

Aıta keteıik, Mańǵystaý oblystyq kópbeıindi aýrýhanasynda mundaı joǵary tehnologııaly neırohırýrgııalyq otalardy jasaýǵa tolyq múmkindik bar. Medıtsınalyq mekeme zamanaýı qural-jabdyqtarmen qamtylǵan, sondaı-aq munda bilikti ári tájirıbeli dárigerler toby qyzmet atqarady.

Oksıpıtospondılodez — jelke súıegi men moıyn omyrtqalaryn bekitý arqyly omyrtqanyń turaqtylyǵyn qalpyna keltiretin asa kúrdeli neırohırýrgııalyq operatsııa. Ol julyn men mı baǵanasyn zaqymdanýdan qorǵaý maqsatynda jasalady jáne medıtsınalyq tájirıbede sırek qoldanylady. 

Aıta ketelik «Reprodýktıvtik týrızm» — depýtat sheteldikter úshin «sýrrogat ana» bolýǵa tyıym salýdy usyndy.