Aqtaýda Shotan batyrǵa eskertkish ornatyldy
Eskertkish áýejaı jolynyń qıylysynda oryn tepken.
Sharaǵa Mańǵystaý oblysynyń ákimi Nurlan Noǵaev, Qazaqstannyń halyq ártisi Asanáli Áshimov, depýtattar, qoǵam belsendileri, Shotan batyr urpaqtary men qala turǵyndary qatysty.
«Shotan Nazaruly – Jońǵar shapqynshylyǵynda jerimizdi jaýdan azat etken batyrlardyń biri, kishi júzdiń týmasy. Batyrdyń búgingi urpaǵy onyń erligin maqtan tutady. Búgin óńir úshin eń mańyzdy tarıhı kúnniń kýási bolyp otyrmyz. Bizdiń ortaq mindetimiz — batyr babalarymyzdyń erligin keıingi urpaqqa dáripteý. Memleket basshysy Qasym-Jomart Toqaev óziniń Qazaqstan halqyna Joldaýynda eli, jeri úshin kúresken, ulan-ǵaıyr atyrapty jaýdan qorǵaǵan batyr ata-babamyzdyń erligin máńgi este saqtaý kerektigin atap ótti. Sondyqtan erlerimizdiń dańqyn asqaqtatyp, salt-dástúrimizdi qosa ulyqtaýymyz kerek. Keń baıtaq jerimizdi jaýdan azat etip, elimizdiń bolashaǵy úshin táýelsiz tutastyǵymyz jolynda kúresken ata-babamyzdyń kózsiz erligi biz úshin árqashan úlgi»,- dedi Nurlan Noǵaev
Tarıhqa kóz júgirtsek, Jońǵar shapqynshylyǵy kezinde Er Shotan Abylaı han men Ábilqaıyr hannyń senimdi serigi bolǵan. Ol Qabanbaı, Bógenbaı, Ótegen syndy batyrlarmen birge qazaq jerin jaýdan qorǵaǵan.
Búgingi eskertkish Shotan batyr urpaqtarynyń bastamasymen jáne kásipkerlerdiń qoldaýymen ornatyldy.
Eskertkishtiń avtory – sýretshi, músinshi Kósher Baıǵazıev.
Monýmenttiń bıiktigi – 12 metr, salmaǵy – 5 tonna. Qurylysy 2021 jyly bastaldy.
